Qasym-Jomart Toqaev pen Natasha Pırs-Mýsar Qazaqstan-Slovenııa bıznes-forýmyna qatysty, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy sońǵy 30 jylda Qazaqstan men Slovenııanyń ózara qurmetke negizdelgen berik saıası-dıplomatııalyq baılanys ornatqanyn atap ótti. Prezıdenttiń aıtýynsha, keshegi kelissózder barysynda taraptar qos halyqtyń ıgiligi úshin ekonomıkalyq yntymaqtastyqty nyǵaıtýǵa beıil ekenin rastady.
«Qazaqstan – aımaqtaǵy ekonomıkasy qarqyndy ósip kele jatqan iri elderdiń sanatynda. Byltyr elimizdiń ekonomıkalyq ósimi 4,8 paıyz deńgeıinde boldy. Bul boljanǵan jahandyq ósimnen 1,5 ese joǵary. Ishki jalpy ónim kólemi 288 mıllıard dollarǵa jetti. Biz aýqymdy saıası jáne ekonomıkalyq reformalardy júzege asyra otyryp, osy damý kórsetkishin saqtaýǵa nıettimiz», dedi Qasym-Jomart Toqaev.
Prezıdent Qazaqstannyń Eýrazııadaǵy jetekshi saýda ári logıstıka habyna aınalýǵa umtylatynyn, oǵan óziniń strategııalyq turǵydan ornalasýy múmkindik beretinin atap ótti.
«Qazaqstan Eýrazııalyq ekonomıkalyq odaq elderinde, Ortalyq Azııa aımaǵynda jáne Qytaıda turatyn 1,5 mıllıardtan astam tutynýshyǵa tikeleı shyǵý múmkindigin usyna alady. Elimizdiń aýmaǵy arqyly ótetin júk tasymalynyń kólemi byltyr rekordtyq kórsetkishke, ıaǵnı 514 tonna-shaqyrymǵa jetti. Qazirgi ýaqytta Qazaqstan Eýropa men Qytaı arasyndaǵy qurlyqtyq alys-beristiń 90 paıyzyn qamtamasyz etip otyr. Biz Orta dáliz jáne Soltústik – Ońtústik sekildi halyqaralyq kúre joldardy belsendi túrde damytýdy qolǵa aldyq. Aqtaý jáne Quryq porttary Kaspıı teńizindegi júk tasymalynda mańyzdy ról atqarady. Atalǵan teńiz aılaqtarynan jóneltiletin júk kólemi byltyr 4,5 mıllıon tonnaǵa jetti (2023 jylǵy 2,5 mıllıon tonnamen salystyrǵanda 62 paıyz ósim). Bul – rekordtyq nátıje. Osy oraıda kólik baılanysyn kúsheıtip, saýda-sattyqty jandandyrý úshin Slovenııanyń eń iri Koper portymen tájirıbe almasýdy jáne seriktestikti tereńdetýdi kózdeımiz», dedi Qasym-Jomart Toqaev.
Memleket basshysy ónerkásip jáne energetıka salalaryndaǵy yntymaqtastyqty ekijaqty qarym-qatynastyń perspektıvti baǵyty retinde atady. Prezıdenttiń pikirinshe, qazaqstandyq munaıdyń 70 paıyzǵa jýyǵy Eýropa Odaǵy elderine eksporttalady. Barlanǵan tabıǵı gaz qory 3 trıllıon tekshe metrge jetedi. Al kómir kenishi 34 mıllıard tonnany quraıdy, bul rette elimiz álemdik ondyqqa kiredi.
«Búginde Qazaqstan EO ekonomıkasy úshin asa mańyzdy 34 sırek kezdesetin mıneraldyń 19 túrin óndiredi. Osy sektordyń áleýetin tolyq paıdalaný maqsatynda álemniń jetekshi kompanııalarymen pragmatıkalyq formýlaǵa saı, ıaǵnı «shıkizat ornyna ınvestısııa men tehnologııa» degen qaǵıdaǵa súıene otyryp áriptestik quramyz. Halyqaralyq iri kompanııalardyń kóbi Qazaqstandaǵy jasyl energetıkaǵa ınvestısııa quıady, olardyń arasynda Fransııanyń Total, Italııanyń Eni, Birikken Arab Ámirlikteriniń Masdar jáne Germanııa men Shvesııanyń Svevind Energy Group kompanııalary bar. Slovenııanyń Iskra, Gorenje sııaqty ozyq kompanııalary bizdiń naryqta tabysty jumys istep keledi», dedi Prezıdent.
Memleket basshysy elimiz aýyl sharýashylyǵyna basa nazar aýdaratynyn, bul sala jahandyq azyq-túlik qaýipsizdigi máselesin sheshýde negizgi ról atqaratynyn atap ótti. Búginde otandyq aýylsharýashylyq ónimderi álemniń 70-ten astam eline eksporttalady.
Qasym-Jomart Toqaev Qazaqstannyń agroónerkásip keshenin joǵary tehnologııaly sektor retinde qaıta qurý jospary jóninde baıandap, sloven seriktesterin birlesken ınvestısııalyq jobalardy iske asyrýǵa shaqyrdy.
Prezıdenttiń pikirinshe, slovenııalyq Krka, Lek sekildi aldyńǵy qatarly kompanııalarmen farmasevtıka salasyndaǵy yqpaldastyq elimizdiń ishki óndirisin ulǵaıtyp, tehnologııalyq áleýetin keńeıtýge septigin tıgizedi.
Budan bólek, Memleket basshysy Slovenııanyń qarqyndy damyp kele jatqan ınnovasııalyq IT cektoryn ǵylymı zertteýler, startaptar jáne tehnologııalyq bilim berý baǵytynda yntymaqtastyq ornatýǵa úndedi.
Qazaqstan Prezıdenti qarjy qyzmeti men ınvestısııalar salasyndaǵy baılanystarǵa aıryqsha mán berdi. Ol Slovenııanyń iskerlik top ókilderin Astana halyqaralyq qarjy ortalyǵynyń áleýetin zerdelep, atalǵan ekojúıege qosylýdy usyndy.
Qasym-Jomart Toqaev sózin qorytyndylaı kele, Slovenııa bıznesmenderimen bolǵan kezdesýdi ekonomıkalyq baılanysty nyǵaıtatyn mańyzdy qadam retinde baǵalap, kásipkerlerdi bıyl mamyr aıynda ótetin Astana halyqaralyq forýmyna qatysýǵa shaqyrdy.