Jurttyń bári Rysjan dep atap ketken gazetimizdiń qyzmetkeri Rysbala Nursapaqyzy ÁBDIQADYR asqaraly 60 jastyń bıigine kóterilip otyr. Alǵashqy eńbek jolyn respýblıkalyq «Lenınshil jas» gazetinde bastaǵan Rysjan 1984 jyldan bergi ómirin «Egemen Qazaqstan» gazetimen berik baılanystyryp keledi. Osynaý otyz jyl ýaqyttyń ón boıynda óziniń jumysqa degen joǵary jaýapkershiligi, áriptesterine degen qurmet-iltıpaty, kishige qamqorlyǵy, úlkenge izettiligi zor abyroıǵa bóledi. Ol uzaq jyldar qyzmet istegen gazettiń menshikti tilshiler sektorynyń jumysy qashanda qaınap jatatyn. Sol jumystyń qaq ortasynda jarqyrap-jaınap Rysjan júrdi. Tapsyrmalardyń tilshilerge dereý jetkizilýi, olardyń mezgilinde oryndalýy men jedel qabyldanyp alynýy – Rysjannyń jyldar boıy júıeli túrde atqarǵan aýqymdy isiniń naqty kórinisi. Osyndaı kóp jylǵy mańdaı teriniń nátıjesinde «Eren eńbegi úshin» medalimen marapattalyp, «Aqparat salasynyń úzdigi» tósbelgisin keýdesine taqty.
Ár adamǵa jan jylýyn shashyp turatyn Rysjan Nursapaqyzynyń 60 jyldyǵyna arnalǵan basylym ujymyndaǵy basqosýda oǵan degen aqjarylqap tilekterdiń túıdek-túıdegimen aǵytylýynyń da ózindik bir zańdylyǵy men syry bar sekildi. О́ıtkeni, symbatty da jany sulý Rekeńdi úlken de, kishi de árkez maqtanysh tutyp, úlgi etedi.
Bir kezdegi ádemi qyz, kórikti kelinshek Rysjan qazir ul men qyzyn aıalap ósirgen, olardan nemere súıgen asyl ájege aınaldy. Eń bastysy – bar baılyqtyń bastaýy, mine, osy emes pe! Qýanyshyń men baqytyń ámanda qatar júrsin. Ańsaǵan armanyńnyń shyńyna kóterile ber Rysjan! Elińe adal qyzmet etip, abyroıly boldyń, ulaǵatty urpaq tárbıelep, mereıiń ósti. Qýanyshyń taýsylmaı, ómirdiń qyzyǵyna toımaı júre berýińizge tilektespiz.
Egemenqazaqstandyqtar.