Atyraý oblysynda 18 jastaǵy bozbala jol apatynan aýyr jaraqat aldy. Oblystyq aýrýhana dárigerleri onyń ómirine arasha bola almady, dep jazady Egemen.kz.
Atyraý oblystyq densaýlyq saqtaý basqarmasy baspasóz qyzmetiniń aqparatyna qaraǵanda, jol-kólik oqıǵasynan keıin 2007 jylǵy azamat jedel járdem brıgadasynyń kóligimen oblystyq aýrýhanasyna jetkizilgen.
«Aýrýhanaǵa túsken kezde er adamnyń jaǵdaıy óte aýyr boldy. Dárigerler naýqastyń jaǵdaıyn turaqtandyrý úshin barlyq qajetti reanımasııalyq sharany shuǵyl túrde júrgizdi. Alaıda kórsetilgen medısınalyq kómekterge qaramastan pasıenttiń ómirin saqtap qalý múmkin bolmady», dep habarlady basqarmanyń baspasóz qyzmeti.
Atyraý oblystyq polısııa departamentiniń baspasóz qyzmeti rastaǵan derekke súıensek, jol-kólik oqıǵasy 27 naýryzda bolǵan.
«Túski saǵat 13:43 shamasynda Dossor kentinen Atyraý qalasy baǵytyndaǵy joldyń Ońaı ata zıraty tusynda Shacman jáne Hyundai Elantra kólikteri soqtyǵysty. Jol-kólik oqıǵasynyń saldarynan jeńil kóliktegi 2007 jyly jolaýshy túrli dene jaraqatyn aldy. Zardap shekken jolaýshy Atyraý oblystyq aýrýhanasyna jetkizilgen edi», dep málim etti departamenttiń baspasóz qyzmeti.