Ereımentaý aýdanyndaǵy «Jańa Bereke» sharýa qojalyǵynyń qurylǵanyna eki jylǵa endi taıaǵanymen, jańashyl óndirisshilerdiń aıaq alysy oblys aýmaǵynda jaqsy qyrynan atala bastady. Tájirıbeli maman Aıgúl Ramazanova áý bastan-aq jumystyń ýaqyt talabyna saı úılestirilýin birinshi kezekke shyǵarýy óz qaıtarymyn berýde. Mundaǵy basty baǵyt – mal sharýashylyǵyn asyldandyrý bolyp tabylady.
Novomarkovka aýylynyń 15 turǵynyn jumyspen qamtamasyz etken qojalyq burynǵy mal qoralaryn jóndeýmen qatar, qosymsha qurylystar salyp, materıaldyq-tehnıkalyq bazasyn nyǵaıtyp otyr. Aýdandyq ákimdiktiń qoldaýymen 50 gektar jer bólinip, 3000 iri qaraǵa arnalǵan bordaqylaý alańy paıdalanýǵa berildi. Jaıylymdyq jerdiń aýqymy 1 700 gektarǵa jetti.
Sharýa qojalyǵy 2013 jyly qalmaqtyń asyl tuqymdy 93 taıynshasyn, dondyq 5 buqa men 5 jylqy satyp alǵan. Al, ótken jyly sharýashylyqtaǵy iri qaranyń sany 589 basqa jetse, onyń ishinde 326 qunajyn, al 5-eýi óndirýshi buqalardy quraǵan. Buǵan qosa, bashqurt tuqymdy 98 bas asyl tuqymdy jylqy men qushym tuqymdy 5 aıǵyr satyp alyndy. Búginde jylqy úıiri 109 basqa jetkendigi alǵa qoıylǵan maqsattyń bıiktigin aıqyndaıdy.
Mal sharýashylyǵyn asyldandyrý baǵytyndaǵy respýblıkalyq palatanyń quramyna engen ereımentaýlyq qojalyq aýyl ómirin jandandyryp, el ıgiligin eseleı túsetini anyq.
Baqbergen AMALBEK,
«Egemen Qazaqstan».
Aqmola oblysy,
Ereımentaý aýdany.