7 sáýir – Dúnıejúzilik densaýlyq kúni. Bul kún álemdik qaýymdastyqtardyń nazaryn densaýlyq saqtaý salasyndaǵy ózekti máselelerge aýdarýǵa baǵyttalǵan, dep jazady Egemen.kz.
Dúnıejúzilik densaýlyq saqtaý uıymynyń bastamasymen jyl saıyn atalyp ótetin bul kúnniń maqsaty – halyqtyń densaýlyǵyn nyǵaıtý jáne salaýatty ómir saltyn nasıhattaý. Elimizde de bul baǵytta aýqymdy is-sharalar júzege asyrylyp keledi.
Memleket basshysynyń tapsyrmasyna sáıkes, respýblıka kóleminde 500-den astam alǵashqy medısınalyq-sanıtarlyq kómek nysandary salyndy. Bul aýyldyq jerlerdegi medısınalyq qyzmetterdiń qoljetimdiligin arttyrýǵa septigin tıgizedi.
Sonymen qatar, salaýatty ómir saltyn qalyptastyrý maqsatynda 2023-2025 jyldarǵa arnalǵan vedomstvoaralyq jol kartasy ázirlendi. Bul qujat halyqtyń densaýlyq máseleleri boıynsha saýattylyǵyn arttyrýǵa jáne salamatty ómir saltyn ustanatyn azamattardyń úlesin 30%-ǵa deıin jetkizýge baǵyttalǵan.
DDU málimetine sáıkes adam densaýlyǵynyń 50%-y ustanatyn ómir saltyna baılanysty. Sondyqtan zııandy ádetterden bas tartyp, belsendi ómir súrý, durys tamaqtaný jáne stresstik jaǵdaılardan aýlaq bolý – árbir azamattyń óz qolynda.