Atyraýda túngi mezgilde birneshe buzaqy er adamdy aıaýsyz soqqyǵa jyqqan. Zardap shekken jigit aýrýhanaǵa jetkizildi, dep habarlaıdy Egemen.kz.
Oblystyq polısııa departamentiniń baspasóz qyzmeti atalǵan oqıǵaǵa qatysy bar quqyq buzýshylardyń ustalǵanyn habarlady. «Quqyq buzýshylarǵa qatysty qylmystyq is qozǵaldy. Tergeý amaldary júrgizilip jatyr», dep málimdedi departamenttiń baspasóz qyzmeti.
Al oblystyq densaýlyq saqtaý basqarmasy baspasóz deregine qaraǵanda, 5 sáýirde túngi saǵat 02:58-de jedel járdem qyzmetine shaqyrtý túsken.
«Atyraý qalasynyń S.Saýyrǵalıev kóshesindegi turǵyn úıdiń aldynda bolǵan oqıǵa ornyna jedel járdem qyzmetiniń brıgadasy jiberildi. Jedel járdem brıgadasynyń qyzmetkerleri 1984 jylǵy er adamǵa alǵashqy medısınalyq kómek kórsetti. Ol dene jaraqattarymen oblystyq aýrýhanaǵa jetkizildi. Qazirgi kezde naýqastyń jalpy jaǵdaıy – ortasha turaqty», dep habarlady basqarmanyń baspasóz qyzmeti.