Bıyl maýsym aıynyń 9-13 kúnderi aralyǵynda Aqmola oblysy, Zerendi aýylynda ornalasqan kórkem tabıǵatty Aurora Garden demalys aımaǵynda mektep oqýshylary men kolledj stýdentterine arnalǵan «Debat Eli Academy» pikirsaıys akademııasy ótedi. Bul – elimizdiń ár túkpirinen jınalatyn jas pikirsaıysshylar úshin jaz mezgilindegi mańyzdy oqıǵalardyń biri bolmaq, dep habarlaıdy Egemen.kz.
Atalǵan is-sharany «Debat Eli» qoǵamdyq qory QR Oqý-aǵartý mınıstrligine qarasty Respýblıkalyq qosymsha bilim berý oqý-ádistemelik ortalyǵymen birlese otyryp uıymdastyryp otyr. Akademııanyń basty maqsaty – pikirsaıys arqyly jastardyń oılaý qabiletin damytý, sheshendik ónerin shyńdaý jáne patrıottyq rýhyn arttyrý.
Eki lıga – eki baǵyt
Akademııaǵa iriktelgen 50 qatysýshy qazaq jáne aǵylshyn tilinde ótetin eki lıgaǵa bólinedi.
Qazaq lıgasynda tanymal jattyqtyrýshylar men pikirsaıys chempıondary trenıngter júrgizip, qatysýshylarǵa sheshendik óner men strategııalyq oılaýdyń qyr-syryn úıretedi.
Aǵylshyn lıgasynda qatysýshylarǵa shetelden arnaıy shaqyrylǵan halyqaralyq deńgeıdegi spıkerler sabaq beredi. Bul – aǵylshyn tilindegi pikirsaıys sheberligin damytýmen qatar, álemdik debat mádenıetimen tanysýdyń taptyrmas múmkindigi.
Qatysý sharttary
Akademııaǵa qatysý úshin úmitkerler 8-24 sáýir aralyǵynda arnaıy tirkeý formasyn toltyryp, 600 sımvoldan aspaıtyn motıvasııalyq hat tapsyrýy qajet.
Irikteý kezeńderi:
25 sáýir – motıvasııalyq hattar negizinde iriktelgen qatysýshylar tizimi jarııalanady;
28 sáýir - 2 mamyr – úmitkerler onlaın suhbattan ótedi;
5 mamyr – ár lıga boıynsha 25 úzdik qatysýshynyń fınaldyq tizimi www.debateli.kz saıtynda jáne @rumcdo_official Instagram paraqshasynda jarııalanady.
Barlyǵy – qatysýshylar úshin
Akademııaǵa qatysý tegin. Uıymdastyrýshylar tarapynan jatyn oryn men úsh mezgil tamaqpen qamtamasyz etiledi. Jol shyǵyndary qatysýshylardy jiberýshi taraptyń esebinen qarastyrylady.
«Debat Eli Academy» – bul jaı ǵana oqý baǵdarlamasy emes. Bul – pikirsaıys mádenıeti arqyly jeke damý, jańashyl oılaý jáne jańa dostar tabýdyń erekshe alańy. Qazaqstannyń túkpir-túkpirinen kelgen jas debaterler úshin bul akademııa jazǵy maýsymdaǵy umytylmas tájirıbe men shabyttyń qaınar kózi bolmaq.