Semeıdegi Muhtar Áýezov atyndaǵy pedagogıkalyq kolledjde «Adal azamat» birtutas tárbıe baǵdarlamasy aıasynda oblys ákimi Berik Ýálımen MEETUP-kezdesý ótti.
Atalǵan is-sharaǵa oblystyq máslıhat tóraǵasy, ardager ustazdar, joǵary oqý oryndarynyń basshylary, mektepke deıingi, orta, tehnıkalyq jáne kásiptik bilim berý uıymdarynyń ókilderi men stýdentter qatysty.
Jıynda oblys ákimi «Adal azamat» birtutas tárbıe baǵdarlamasynyń urpaq tárbıesi úshin mańyzy joǵary ekenin aıtty.
«Memleket basshysy Qasym-Jomart Toqaev Ulttyq quryltaıdyń «Ádiletti Qazaqstan – Adal azamat» atty otyrysynda sóılegen sózinde Abaı murasyna súıene otyryp, «Adal azamat» tujyrymdamasynyń mańyzyn aıryqsha atap ótti. «Prezıdentimizdiń «Ozyq oıly urpaq ósirý úshin bilim men tárbıe árdaıym qatar júrýi kerek»degen sózi barsha bilim salasy ókilderine ortaq qaǵıda bolýǵa tıis. Urpaqqa beriletin bilimniń mazmuny men tárbıeniń baǵyty bir arnada toǵysqanda ǵana biz sanaly da salıqaly tulǵany qalyptastyra alamyz. Adaldyq – qaı zamanda da adam balasynyń eń asyl qasıeti bolǵan. Sondyqtan biz jas urpaqqa tek bilim ǵana berip qoımaı, oıyna parasat, boıyna izgilik darytýymyz kerek. Bul jolda eń úlken jaýapkershilik, árıne, ustazdar men bilim salasynyń maıtalmandaryna júkteledi», dedi aımaq basshysy.
Sonda-aq oblys ákimi jıynda óńirdiń bilim salasynda júzege asyrylatyn jobalarǵa toqtalyp, Prezıdent tapsyrmasymen Semeıdegi Oqýshylar saraıynyń qurylysyn aıaqtaýǵa qarjy bólingenin aıtty. Aımaqtaǵy jastardyń bastamalaryn qoldaý maqsatynda Jastar isi jónindegi basqarma qurylatynyn jetkizdi.
Kezdesýde Qazaqstannyń Eńbek Eri, ardager ustaz Alma Shúkijanova, Muhtar Áýezov atyndaǵy pedagogıkalyq kolledj dırektory Shaǵangúl Janaeva, oblystyq bilim qyzmetkerleriniń ardagerler keńesiniń tóraıymy Mádenıet Ahmetova, Álıhan Bókeıhan ýnıversıtetiniń tárbıe jumysy jáne áleýmettik máseleler jónindegi prorektory Aırat Bazenov, respýblıkalyq «Mektepke deıingi uıymnyń úzdik pedagogi» baıqaýynyń jeńimpazy Irına Bocharova, «Qazaqstan Respýblıkasynyń úzdik 100 stýdenti» baıqaýynyń jeńimpazy Shoqan Baımýlaev baıandama jasap, oı-pikirlerin ortaǵa saldy.
Kezdesýdiń suraq-jaýap bóliminde qatysýshylar oblys ákimine saýaldaryn qoıyp, usynys-pikirlerin aıtty. Aımaq basshysy óńirde júzege asyrylatyn mańyzdy jobalarǵa toqtalyp, aımaqtyń damýyna, aýyldardy órkendetýge, abattandyrýǵa, «Taza Qazaqstan» baǵdarlamasyna, áleýmettik nysandar salýǵa qatysty josparlarymen bólisti.
Aımaq basshysy kezdesý aldynda Muhtar Áýezov, Júsipbek Aımaýytov, Qanysh Sátbaev, Álkeı Marǵulan syndy tulǵalar bilim alǵan, 120 jyldyq tarıhy bar oqý ornynyń kabınetterin aralap, mýzeı men kitaphana jumysymen tanysty.
Kezdesý aıasynda oblys ákimi «Shabyt», «Smart bala», «Balalar kitaphanasy», «Qamqor», «Eńbegi adal – jas óren», «Ushqyr oı alańy» jobalary boıynsha uıymdastyrylǵan kórmeni tamashalady.