Resmı derekterge sáıkes, 2024 jyly Qazaqstanda balalardyń terezeden qulaý kórsetkishi ótken jylmen salystyrǵanda eki esege artty. Ásirese, 2-5 jas aralyǵyndaǵy búldirshinder úshin bul asa qaýipti. Mundaı qaıǵyly jaǵdaılar kóbine eresekterdiń beıqamdyǵynan jáne terezege arnaıy qorǵanys quraldarynyń ornatylmaýynan bolady, dep habarlaıdy Egemen.kz.
Buǵan qosa sýǵa ketý oqıǵalary da alańdatarlyq ahýalǵa aınalǵan. Byltyr elimizde balalardyń sý aıdyndarynda qaza tabýy ótken jylmen salystyrǵanda 1,5 ese ósken. Bul ásirese 10-16 jas aralyǵyndaǵy balalar men jasóspirimder arasynda jıi kezdesedi. Munyń basty sebepteri – qaraýsyz shomylý jáne arnaıy ruqsat etilmegen, jabdyqtalmaǵan sý aıdyndarynda sýǵa túsý.
Osyǵan oraı Oqý-aǵartý mınıstrligine qarasty Balalardyń quqyqtaryn qorǵaý komıtetiniń tóraǵasy Nasymjan Ospanova ata-analarǵa úndeý joldady.
«Kóktemniń shýaǵymen birge balalarymyzdyń belsendiligi de arta túsedi. Alaıda dál osy kezeńde olardyń ómirine tónetin qaýip-qaterler de eselenetini sózsiz. Bul rette Balalardyń quqyqtaryn qorǵaý komıteti ata-analarǵa, muǵalimderge jáne barsha eresekterge balalardyń kúndelikti ómirine muqııat qaraýǵa shaqyrady. Balalarymyzdyń ómiri – bizdiń qolymyzda! Árbir ata-ana saqtyq sharalaryn ustanyp, qaýipsizdik erejelerine beıjaı qaramaýy tıis. Qaıǵyly oqıǵalardyń aldyn alý úshin myna qarapaıym, biraq asa mańyzdy erejelerdi este saqtańyz:
Birinshi. Terezelerge saqtyq qurylǵylaryn ornatyńyz – arnaıy qulyptar, torlar men bekitkishter balalardyń qulaýyna jol bermeıdi.
Ekinshi. Tek qaýipsiz jerlerde sýǵa túsińiz – qutqarý qyzmeti bar jaǵajaılardy tańdańyz, beıtanys sý aıdyndarynan aýlaq bolyńyz.
Úshinshi. Balalaryńyzdy qaraýsyz qaldyrmańyz – ásirese sý mańynda árdaıym baqylaýda ustańyz.
Tórtinshi. Sýdaǵy qaýip-qaterlerdi túsindirińiz – bıikten sýǵa sekirý, tereńdikte oınaý jáne qatty aǵystarǵa jaqyndaý óte qaýipti ekenin úıretińiz.
Besinshi. Balalardy alǵashqy kómek kórsetýge baýlyńyz – sýǵa ketken adamǵa qalaı kómek kórsetý kerektigin bilýdiń ózi bireýdiń ómirin saqtap qalýy múmkin.
Qurmetti ata-analar! Balalarymyzdyń amandyǵy – bizdiń eń úlken jaýapkershiligimiz. Biz olardyń qaýipsizdigin qamtamasyz etýge mindettimiz. Qaıǵyly jaǵdaılardyń aldyn alý – óz qolymyzda!», delingen atalǵan úndeýde.