QR Ǵylym jáne joǵary bilim mınıstrliginiń Til saıasaty komıteti men Sh.Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵy memlekettik organdar men ulttyq kompanııalardyń resmı ınternet-resýrstarynda qazaq tiliniń qoldanysyna monıtorıng júrgizý boıynsha respýblıkalyq onlaın/oflaın semınaryn ótkizdi, dep jazady Egemen.kz.
Semınarda memlekettik tildiń qoldanys aıasyn keńeıtý, resmı ınternet-resýrstardaǵy jyl saıynǵy monıtorıng júrgizý máseleleri qaraldy. Semınar barysynda baspasóz qyzmetteriniń ókilderi, aqparattyq resýrstardyń mazmunyna jaýapty tulǵalar, aýdarmashylar bul is-sharanyń resmı resýrstardyń sapaly toltyrylýyna, azamattardyń memlekettik tildegi aqparatqa qol jetimdiligin qamtamasyz etýge yqpal etetindigine senim bildirdi.
Jıynda kirispe sóz sóılegen QR Ǵylym jáne joǵary bilim mınıstrligi Til saıasaty komıtetiniń basqarma basshysy Qaıyrjan Rahymjanov bul jobanyń Qazaqstan Respýblıkasyndaǵy til saıasatyn damytýdyń 2023-2029 jyldarǵa arnalǵan tujyrymdamasyn iske asyrý sheńberinde ótetinin jetkizdi. Saraptama-monıtorıng ólshemsharttary "Qazaqstan Respýblıkasyndaǵy til týraly", "Aqparatqa qol jetkizý týraly" Qazaqstan Respýblıkasy zańdarynyń talaptaryna saı negizdelgenin aıtty.
Monıtorıng barysynda resmı saıttyń memlekettik tilde ashylýy, onyń tolyqqandy, sapaly ári saýatty mátindermen toltyrylýy basty nazarǵa alynyp, uıym týraly aqparattyń, baılanys derekteriniń, resmı qujattardyń, qaýlylardyń, buıryqtardyń, jańalyqtardyń, baspasóz relızderiniń, ınfografıkalardyń, jarnamalyq banerlerdiń, basqa da málimetterdiń bekitilgen ólshemsharttarǵa saı jarııalanýy zerdelenedi.