Túrki áleminiń rýhanı astanasy – Túrkistan qalasynyń erekshe mártebege ıe bolýyna oraı uıymdastyrylǵan «TURKISTAN STYLE» halyqaralyq sýretshiler sımpozıýmy óz máresine jetti, dep habarlaıdy Egemen.kz.
Úndistan, Túrkııa, Ázerbaıjan, Belorýssııa, О́zbekstan, Qyrǵyzstan, Reseıden jáne elimizdiń ár óńirinen kelgen tanymal sýretshiler qatysqan sımpozıýmda 120-dan astam shyǵarma usynyldy. О́z týyndylary arqyly qylqalam sheberleri erekshe mártebege ıe bolǵan Túrkistandy ulyqtaýǵa úles qosty. Aptaǵa jýyq sozylǵan is-sharanyń qorytyndysy retinde «Kongress holl» kesheniniń foıesinde halyqaralyq sýretshiler sımpozıýmynyń shyǵarmalarynan kórme uıymdastyryldy. Iаǵnı qylqalam sheberleriniń Túrkistannyń qazirgi beınesi beınelengen sýretteri jurtshylyqqa usynyldy.
Kórmeniń ashylý rásiminde Túrkistan oblysy ákiminiń orynbasary Ertaı Altaev «TURKISTAN STYLE» halyqaralyq sımpozıýmyna qatysýshy sýretshilerdi dıplomdarmen marapattap, sertıfıkattar tapsyrdy. «Túrkistan qalasy zamanaýı qaıta jańǵyryp, erekshe mártebege ıe bolǵanyn bilesizder. Osyndaı sátte sýretshilerdiń rýhanı astananyń kóne tarıhy men jańarýyn beınelegen týyndylary, onyń ejelgi tarıhyna taǵy bir úńilip, kıeli Túrkistannyń búgingi kúnin óner tilimen ulyqtaýy – quptarlyq is. Sizder salǵan óner týyndylary urpaqqa eń qymbat mura, mańyzy zor derekti mıras bolyp qalatyny sózsiz», dedi Ertaı Altaev. Sondaı-aq Qyrǵyzstan Respýblıkasynyń halyq sýretshisi, Toqtoǵul atyndaǵy memlekettik syılyqtyń ıegeri akademık Iýrıstanbek Shyǵaev pen Qazaqstan Respýblıkasy Kórkem akademııasynyń akademıgi jáne vıse-prezıdenti Erlan Aıtýarov beıneleý ónerin damytý maqsatyndaǵy osyndaı aýqymdy is-sharalardyń mańyzdylyǵyna toqtalyp, sýretshiler atynan alǵysyn bildirdi.