Ekinshi dúnıejúzilik soǵystaǵy Jeńistiń 80-jyldyǵyn merekeleý aıasynda Qazaqstan Elshiligi Sofııadaǵy Reseılik mádenı-aqparattyq ortalyqta qazaqstandyq «1941 jyldyń jazy» fılminiń kórsetilimin uıymdastyrdy. «Ulttyq kınony qoldaý memlekettik ortalyǵynyń» qoldaýymen uıymdastyrylǵan is-sharaǵa dıplomatııalyq korpýstyń, qazaq dıasporasynyń ókilderi jáne bolgar kınosúıer qaýymy qatysty, dep habarlaıdy Egemen.kz.
Qazaqstannyń Bolgarııadaǵy Elshisi Vıktor Temirbaev óziniń quttyqtaý sózinde Qazaqstannyń dúnıejúzindegi jalpy jeńiske, ádildik pen bostandyqtyń saltanatyna zor úles qosqanyn atap ótti. Qazaq dıplomaty óskeleń urpaq úshin keremet batyldyq pen shynaıy patrıotızmniń úlgisi ekinshi dúnıejúzilik soǵys jyldaryndaǵy otandastarymyzdyń jaýyngerlik jáne eńbek erlikterine nazar aýdardy. Sondaı-aq ol Jeńiske keremet kúsh-jiger men orasan zor qurbandyqtardyń baǵasymen qol jetkizilgenin, atap aıtqanda, ol maıdangerlerdiń teńdesi joq batyldyǵy men myzǵymas rýhynyń, tyl eńbekkerleriniń tabandylyǵy men janqııarlyǵynyń arqasynda júzege asqanyn atap ótti.
Rejıssıor Bekbolat Shekerovtyń «1941 jyldyń jazy» fılmi soǵys jyldaryndaǵy partızandyq otrıadtarmen bolǵan shaıqastar týraly baıandaıdy. Kınokartına Uly Otan soǵysy jyldaryndaǵy batyldyǵymen erekshelengen jáne dıversııalyq toptardy basqarǵan kórnekti qazaq qaıratkeri, leıtenant Adı Sharıpovtyń ómirbaıandyq tarıhyn kórsetedi.
Qazaqstandyq kınokartına bolgar aýdıtorııasy men is-sharanyń barlyq qonaqtarynyń qyzyǵýshylyǵyn týdyrdy.