Astanada «InterMýltıServıs» men «Technic Destroy» seriktestikteri makýlatýra jetkizý boıynsha ózara yntymaqtastyq týraly kelisim jasasty, dep habarlaıdy Egemen.kz.
Bul joba «Jasyl damý» aksıonerlik qoǵamynyń qoldaýymen júzege asyrylyp jatyr. Yntymaqtastyq 2024–2029 jyldarǵa arnalǵan «Taza Qazaqstan» ekologııalyq mádenıetti damytý tujyrymdamasynyń aıasynda qolǵa alyndy. Atalǵan qujattyń basty maqsaty – elimizdegi qorshaǵan ortanyń jaı-kúıin jaqsartý.
«InterMýltıServıs» – 2008 jyly Almaty qalasynda negizi qalanǵan, gofr kartonnan jasalatyn qaptamalar óndirisinde kósh bastap turǵan otandyq kásiporyndardyń biri. Kompanııa óndiris barysynda zamanaýı tehnologııalardy qoldana otyryp, qorshaǵan ortaǵa keletin zııandy azaıtý maqsatynda qaıta óńdelgen shıkizatty belsendi túrde paıdalanady.
Al «Technic Destroy» JShS – qaldyqtardy qaıta óńdeýge baǵyttalǵan mamandandyrylǵan kompanııa. 2024 jyldyń tamyzynda bul kompanııa Almatyda Qazaqstandaǵy alǵashqy lıtıı-ıondy batareıalardy qaıta óńdeıtin zaýytty iske qosty. Kásiporyn aı saıyn 20 tonnaǵa deıin akkýmýlıatorlardy qaıta óńdep, quramynan lıtıı untaǵyn, alıýmınıı men mys tárizdi qundy elementterdi bólip ala alady.
Kelisim aıasynda taraptar óndiristik resýrstardy biriktirip paıdalaný, tehnologııalyq tájirıbe men shıkizatpen almasý baǵytynda jumys isteýdi josparlap otyr. Bul seriktestik makýlatýrany óńdeýdiń tıimdiligin arttyryp qana qoımaı, qorshaǵan ortaǵa túsetin júktemeni azaıtyp, salanyń turaqty damýyna jol ashýy tıis. Mundaı ózara árekettestik elimizdegi ekologııalyq ahýaldy jaqsartýǵa baǵyttalǵan bıznestiń nátıjeli yntymaqtastyǵynyń úlgisi bolmaq.