Aqtóbe oblysynyń eki turǵyny mektep oqýshysyna qatysty zorlyq-zombylyq isi boıynsha ómir boıyna bas bostandyǵynan aıyryldy, dep habarlaıdy Egemen.kz.
2024 jylǵy qazanda Aqtóbe oblysynyń turǵyny polısııaǵa júginip, kúıeýiniń týystary 14 jastaǵy qyzyna seksýaldyq sıpattaǵy zorlyq kórsetkenin aıtqan. Qyz anasyna óziniń 8 jasynan beri 20 jáne 25 jastaǵy týystary tarapynan zorlyq kórip júrgenin jetkizgen.
Buǵan deıin oblystyq Polısııa departamenti bul is boıynsha bopsalaý jáne seksýaldyq sıpattaǵy zorlyq-zombylyq áreketteri boıynsha tergeý bastalǵanyn habarlaǵan. Alaıda vedomstvo resmı túrde jábirlenýshiniń kim ekenin jáne kúdiktilerdiń oǵan qandaı týystyq qatynasta ekenin naqtylamaǵan.
2025 jylǵy 23 sáýirde mamandandyrylǵan aýdanaralyq qylmystyq ister jónindegi sot eki aıyptalýshyǵa úkim shyǵardy. Olar Qylmystyq kodekstiń "Kámeletke tolmaǵanǵa qatysty seksýaldyq sıpattaǵy zorlyq áreketteri" jáne "Aldyn ala sóz baılasý arqyly adamdar toby jasaǵan bopsalaý" baptary boıynsha kináli dep tanyldy.
- Sotta Q. jáne K. esimdi aıyptalýshylar aǵasynyń áıeline onyń jeke ómirine qatysty derekterdi jarııa etemiz dep qorqytyp, WhatsApp arqyly 5 mıllıon teńge talap etkeni belgili boldy.
Sonymen qatar, bir aıyptalýshy birneshe jyl boıy aǵasynyń qyzyn seksýaldyq sıpattaǵy zorlyq áreketterine májbúrlegen. Ekinshi aıyptalýshy da 2020 jyldan bastap osyndaı áreketterge barǵan, - delingen aqparatta.
Aıyptalýshylardyń kinási jábirlenýshilerdiń, sonyń ishinde kámeletke tolmaǵan jábirlenýshiniń, kýágerlerdiń aıǵaqtary, zattaı aıǵaqtarmen, saraptama qorytyndylary jáne sotta zerttelgen ózge de dáleldermen rastaldy.
Sot aıyptalýshylardyń kináni ishinara moıyndaýyn, ókinish bildirýin jáne kámeletke tolmaǵan jábirlenýshiniń pikirin jazany jeńildetetin mán-jaılar retinde tanydy.
Qylmystyq jaýaptylyqty jáne jazany aýyrlatatyn mán-jaılar anyqtalǵan joq.
Aqtóbe oblystyq sotynyń baspasóz qyzmeti málimetinshe, sot úkimimen Q. jáne K. Qylmystyq kodekstiń 194-baby 2-bóligi 2-tarmaǵy, 121-baby 4-bóligi boıynsha kináli dep tanylyp, 58-baptyń 4-bóligi negizinde qylmystar jıyntyǵy boıynsha árqaısyna ómir boıyna bas bostandyǵynan aıyrý jazasy taǵaıyndaldy. Sonymen qatar, olar ómir boıy pedagogıkalyq jáne kámeletke tolmaǵan balalarmen jumys isteýge baılanysty laýazymdardy atqarý quqyǵynan aıyryldy.