Parlament Májilisiniń depýtaty, Qarjy jáne bıýdjet komıtetiniń múshesi Nurlan Jazylbekov Rýmynııa Parlamentiniń Depýtattar palatasy Parlamentaralyq odaqpen birlesip uıymdastyrǵan Ortalyq jáne Shyǵys Eýropa parlamentteriniń Ornyqty damý maqsattary jónindegi óńirlik semınar jumysyna qatysty. Semınar Býharest qalasynda ótti.
Is-shara barysynda Ornyqty damý maqsattary jáne olardyń Ortalyq jáne Shyǵys Eýropa óńirindegi máni, olardy iske asyrýdaǵy parlamentterdiń róli, parlamentter men azamattyq qoǵamnyń birlesken jumysy, genderlik teńdik, sondaı-aq, Ornyqty damý maqsattaryn júzege asyrý arqyly tótenshe jaǵdaılar men klımattyń ózgerý táýekelderin azaıtý máseleleri talqylandy.
Is-shara barysynda N.Jazylbekov Rýmynııanyń Parlamenti Depýtattar palatasynyń Syrtqy saıasat komıtetiniń tóraǵasy Laslo Barbelamen kezdesti. Depýtattar ózekti halyqaralyq kún tártibindegi máseleler jóninde pikir almasty.
Sapar barysynda qazaqstandyq depýtat «Qazaqstan-Rýmynııa» parlamenttik dostyq tobynyń basshysy, Rýmynııa Parlamenti Depýtattar palatasynyń múshesi Kostel Aleksemen kezdesý ótkizip, qazirgi kezdegi parlamentaralyq yntymaqtastyqtyń jaı-kúıin, sondaı-aq, eki el parlamentteri arasyndaǵy baılanysty damytý jaıyn talqylady.
Kezdesý sońynda K.Alekse Rýmynııa Parlamenti Depýtattar palatasynyń tóraǵasy Valerıý Zgonıanyń Qazaqstan Parlamenti Májilisiniń Tóraǵasy Q.Jaqypovqa Býharestke resmı saparmen kelý jónindegi shaqyrýyn tabys etti, dep habarlady Májilistiń baspasóz qyzmeti.