Qazaqstan Respýblıkasy Mádenıet jáne aqparat mınıstrligi Uly Otan soǵysyna qatysqan qazaqstandyq maıdangerlerdi eske alý maqsatynda «Batyrlarǵa taǵzym» (batyrlarga-tagzym.kz) atty onlaın-portaldy iske qosty. Jobanyń maqsaty – soǵysta erlik kórsetken azamattar týraly bolashaq urpaqqa qundy aqparat jetkizý, dep jazady Egemen.kz.
Portalda keń kólemdi málimetter bazasy qarastyrylǵan. Saıtta qazirdiń ózinde 677 myńnan astam soǵys ardageri týraly aqparat jınaqtalǵan. Olardyń qatarynda 365 Keńes Odaǵynyń Batyry, 4 eki márte Keńes Odaǵynyń Batyry jáne 19 «Dańq» ordeniniń kavaleri bar.
Saıttyń ınterfeısi qajetti aqparatty ońaı tabýǵa múmkindik beredi. Sonymen qatar, paıdalanýshylar óz ardager týystary týraly derekterdi qosa alady, jańalyqtarmen tanysa alady. Osylaısha, bul portal – erlikti dáriptep, tarıhty bolashaq urpaqqa jetkizetin jáne batyrlarǵa taǵzym etýge arnalǵan zamanaýı platforma.
Onlaın-portal paıdalanýshylary úshin kelesi múmkindikter qarastyrylǵan:
О́z týysynyń tarıhyn qosý: árbir adam soǵysqa qatysqan jaqyndary týraly esteliktermen bólise alady.
Fotosýretter júkteý: qoldanýshylar ardager týystarynyń sýretterin portalǵa júkteı otyryp, olardyń beınesin máńgilikke saqtaý múmkindigine ıe.
Jańa málimetter engizý: veb-portal derekqorynda joq ardagerler týraly aqparatty ońaı qosýǵa bolady.
Batyrlar galereıasyn qaraý: saıtta kóptegen ardagerlerdiń ómirbaıany jınaqtalǵan arnaıy galereıa bólimi bar. Qoldanýshylar bul bólim arqyly olardyń ómiri men erlikteri jaıly keńirek málimet ala alady.
Jańalyqtarmen tanysý: portal ardagerler men jobaǵa qatysty jańalyqtar men oqıǵalardy únemi jarııalap otyrady.
Aıta keteıik, Jeńistiń 80 jyldyǵyna oraı elimiz boıynsha 200-den astam túrli is-shara ótkizý josparlanǵan.