Búgin Almatyda «Ortalyq Azııa – Qytaı» formatyndaǵy syrtqy ister mınıstrleriniń 6-shy kezdesýi ótti. Oǵan Qazaqstan Syrtqy ister mınıstri Murat Nurtileý, Qytaı Syrtqy ister mınıstri Van I, Qyrǵyzstan Syrtqy ister mınıstri Jeenbek Kýlýbaev, Tájikstan Syrtqy ister mınıstri Sırodjıddın Mýhrıddın, О́zbekstan Syrtqy ister mınıstri Bahtııor Saıdov pen Túrikmenstan ókili qatysty.
Kezdesý barysynda saıası dıalogty nyǵaıtý, saýda-ekonomıkalyq baılanystardy keńeıtý, kóliktik ózara baılanysty damytý, syn-tegeýrinder men qaýip-qaterlermen birlesken kúresý, sondaı-aq óńirdegi ornyqty damý men ekologııalyq qaýipsizdik máselelerine basty nazar aýdaryldy. Ortalyq Azııanyń Qytaımen ózara syılastyq pen teńdik qaǵıdattarynda kópjaqty ózara is-qımylynyń arhıtektýrasyn jaqsartý jónindegi usynystar talqylandy.
Taraptar zamanaýı syn-tegeýrinderge teńshelgen kózqarastardyń qajettiligin atap ótip, ózara tıimdi damý jolyndaǵy qadamdardy kelisti.
Murat Nurtileý óz sózinde óńirdegi turaqtylyqty qamtamasyz etý úshin sheshýshi salalardaǵy yntymaqtastyqty odan ári keńeıtý qajettigine nazar aýdara otyryp, «Ortalyq Azııa – Qytaı» kópjaqty formatyn nyǵaıtýdyń mańyzdylyǵyn atap ótti.
«Formatymyzdyń «Ortalyq Azııa +» tetikteri arasynda flagmanǵa aınalýy, al kóshbasshylardyń aldaǵy kezdesýi máńgilik dostyq pen órkendeýdiń jańa kezeńine qadam basý úshin barlyq jaǵdaı jasalýda», – dedi Qazaqstan SIM basshysy.
Otyrysqa qatysýshylar jahandyq syn-qaterler jaǵdaıynda syndarly dıalogty jalǵastyrýdyń, baılanystardy damytýdyń jáne basym baǵyttar boıynsha kúsh-jigerdi úılestirýdiń mańyzdylyǵyna nazar aýdaryp, osy formattaǵy turaqty kezdesýlerge daıyn ekenin bildirdi.
Is-shara qorytyndysy boıynsha syrtqy ister mınıstrleri Aqparattyq kommıýnıkeni qabyldady, onda «Ortalyq Azııa – Qytaı» formaty sheńberinde tatý kórshilik, ornyqty damý jáne kópjaqty ózara is-qımyldy tereńdetý qaǵıdattaryna ortaq mindetteme bekitildi.