Túrkistan oblysy, Ordabasy aýdany, Temirlan aýylynda jańa mýzykalyq óner mektebiniń qurylysyn bastaý sheńberinde ýaqyt kapsýlasyn salý rásimi ótti. Atalǵan mekteptiń qurylysy – Memleket basshysynyń tapsyrmasyna sáıkes qaıtarylǵan kapıtaldy halyq ıgiligi úshin tıimdi paıdalaný aıasynda Úkimetpen maquldanǵan áleýmettik jobalardyń biri, dep jazady Egemen.kz.
Saltanatty rásimge oblys ákimi Nuralhan Kósherov, Bas prokýratýranyń aktıvterdi qaıtarý komıtetiniń tóraǵasy Nurdáýlet Súıindikov, oblys prokýrory Murat Tileýberdıev jáne aýyl turǵyndary qatysty. Jergilikti aqsaqaldyń batasynan keıin qatysýshylar bolashaq urpaqqa arnalǵan ýaqyt kapsýlasyn saldy. Quny 890 mln teńge turatyn 300 oqýshyǵa arnalǵan jańa mektep kórshiles aýyldardyń oqýshylaryn da qabyldaıtyn bolady.
Is-shara barysynda Prezıdenttiń tapsyrmasyna sáıkes Úkimet arnaıy memlekettik qordan bilim berý, densaýlyq saqtaý, sport jáne kommýnaldyq ınfraqurylymdy jańǵyrtý salalarynda 280 áleýmettik nysannyń qurylysyn qarjylandyrý úshin qarajat bólgeni aıtyldy. Búginge memleket paıdasyna jalpy somasy shamamen 610 mlrd teńge kóleminde aktıvter qaıtarylǵan, onyń ishinde 506 mlrd teńge – aqshalaı qarajat, 103 mlrd teńge – múlik.
Aıta keteıik, buǵan deıin aýylda 1974 jyly salynǵan, qazirgi tańda apatty jaǵdaıda turǵan mýzykalyq mektep jumys istep kelgen bolatyn.