Damý kepili

Prezıdent janyndaǵy Ortalyq kommýnıkasııa­lar qyzmetinde «Halyq kelisimi» qoǵamdyq qorynyń dırektory Zııabek Qabyldınovtyń qatysýymen brıfıng ótti. Onda Memleket basshysy Nursultan Nazarbaev usynǵan bes ınstıtýttyq reforma jáne ony júzege asyrý maqsatynda qabyldanǵan «100 naqty qadam» Ult jospary jóninde keńinen sóz boldy. Spıker 5 ınstıtýttyq re­formanyń belgilenýi elimizdiń damýyna, túrli máselelerdiń óz deńgeıinde sheshilýine kepil bolatynyn aıta kelip, maqsatymyzdy aıqyndaı túsken «100 naqty qadam» atty Ult josparynyń artyqshylyqtaryna  nazar aýdardy. – Elbasy usynǵan 5 ıns­tıtýttyq reformada qoǵam, eldiń aldyndaǵy máselelerdi qalaı sheshýdiń baǵyt-baǵdaryn atap kórsetti. Bizdiń oıymyzsha, qoǵamda qalyptasqan ózekti máseleler osy Ult jospary arqasynda sheshiledi, buǵan senimdimiz, – dedi Zııabek Qabyldınov. «Halyq kelisimi» qoǵamdyq qory dırektorynyń aıtýynsha, «100 naqty qadam» Ult jos­paryn óz deńgeıinde oryndap shyǵý – jalpyhalyqtyq is. Barsha qazaqstandyqtar bes ınstıttýttyq reformany, Ult josparyn jete túsinip, ony júzege asyrý maqsa­tynda kúsh biriktirýi qajet. Budan bólek, ol qazirgi tańda Qazaqstanda qolǵa alynyp jatqan aýqymdy sharalar zaman talabyna laıyqty jaýap bere alatynyn jetkizdi. – Qazir álemde ekonomıkalyq daǵdarys júrip jatyr, buǵan qosa, alyp memleketter bir-biri­ne sanksııa jarııalaýda. Kórshi elderdiń valıýtasy devalvasııaǵa ushyrap jatqan jaǵdaı bar. Osyndaı jaǵdaıattar beleń alyp otyrǵanda Prezıdent Nursultan Nazarbaevtyń  «100 naqty qadam» Ult josparyn jarııalaýy óte durys boldy. Bul Ult jospary Qazaqstandy damýdyń dańǵyl jolyna túsiredi, halqymyzdyń áleýmettik jaǵdaıyn kóterýge jol ashady, azamattarymyzdyń atqarýshy bılikke degen senimin nyǵaıta túsedi, – dedi «Halyq kelisimi» qoǵamdyq qorynyń dırektory. Buǵan qosa, spıker elimizdiń álem aldyndaǵy bedeliniń arta túskenin sóz etti. – Sońǵy ýaqytta Qazaqstandy álem tanydy. Bizdiń ekonomıka qarqyndy damyp keledi, bilim men ǵylym, mádenıet salalarynda aıtarlyqtaı jetistikterge qol jetkizdik. «Astana», «Qazaqstan», «Nazarbaev» sózderi turaqtylyq pen damýdyń sımvolyna aınaldy, – dedi ol. Z.Qabyldınovtyń pikirin­she, Qazaqstan álemge tole­rant­tylyqtyń jarqyn úlgisin kórsetýde. – Bizdiń el kóptegen ıgi bas­tamalarǵa uıytqy boldy. Qazaq­standa Álemdik jáne dástúrli dinder lıderleriniń sezderi uıymdastyrylyp keledi, EQYU sammıti ótti, al 2017 jyly Qa­zaqstan EKSPO halyqaralyq kórmesin usynady. Osy barlyq ıgi bastamalar men oń ózgeristerdiń negizinde ultaralyq kelisim, tatýlyq jatqany daýsyz, – dedi «Halyq kelisimi» qoǵamdyq qory­nyń dırektory. Joldybaı BAZAR, «Egemen Qazaqstan».