Qazaqstannyń Lıvandaǵy Dıplomatııalyq mıssııasy Qazaqstan Respýblıkasynyń Prezıdenti Nursultan Nazarbaev jarııa etken 5 ınstıtýttyq reformany júzege asyrý boıynsha 100 naqty qadamnan turatyn Ult josparyn túsindirý maqsatynda baspasóz máslıhatyn ótkizdi.
Baspasóz máslıhatyna Lıvandaǵy birqatar kórnekti saıası jáne isker toptardyń qaıratkerleri jáne buqaralyq aqparat quraldarynyń ókilderi qatysty.
Is-shara bastalar aldynda Qazaqstannyń Lıvandaǵy Senimdi ókili Dáýlet Emberdıev Lıvannyń «TeleLıban» ortalyq teledıdar arnasyna 5 ınstıtýttyq reforma jóninde suhbat berdi.
D.Emberdıev Ult jospary Qazaqstannyń qazirgi zamannyń qaýip-qaterlerine jaýaby bolyp tabylatynyn jáne onyń iske asyrylýy aldaǵy 10-15 jylda álemdegi asa damyǵan 30 memlekettiń qataryna kirýge múmkindik beretinin atap ótti.
Baspasóz máslıhatyna qatysýshylar Qazaqstanda josparlanǵan reformalarǵa joǵary baǵa berdi. Atap aıtqanda, Lıvannyń aýyl sharýashylyǵy ónimderin óndirýshilerdiń jalpy sındıkatynyń prezıdenti Arslan Sınno qazirgi jaǵdaılarda osy reformalardyń ýaqtyly qolǵa alynǵanyn erekshe atap ótip, olardyń arqasynda Qazaqstan óz damýynyń túbegeıli jańa deńgeıine shyǵatyndyǵyna senim bildirdi.
Lıvan Olımpıadalyq komıteti prezıdentiniń orynbasary Mazen Ramadan osy reformalardyń ózektiligine toqtaldy. Al Lıvannyń Memlekettik qyzmet isteri agenttigi basshysynyń orynbasary Nıssrın Mashmýshı óz elindegi memlekettik qyzmet ınstıtýtyn damytý úshin qoldanýǵa bolatyn birinshi reformanyń kóptegen tarmaqtaryn ózine belgilep alǵandyǵyn málimdedi.
Tilshilerdiń jumystaryn jeńildetý maqsatynda dıpmıssııa tarapynan Ult josparynyń mátini aǵylshyn jáne arab tilderinde daıyndalyp, úlestirmeli materıaldar túrinde taratyldy. Sonymen qatar, EKSPO-2017 taqyrybyndaǵy materıaldar da berildi.
«Egemen-aqparat».