Búgin Oral qalasyndaǵy «Jaıyq Arena» sport kesheninde Astanada uıymdastyrylǵan Otan qorǵaýshylar kúnine arnalǵan áskerı sherýdiń tikeleı efır kórsetilimi ótti. Bul sharaǵa 1200-ge jýyq qala turǵyny jınalyp, elimizdiń basty alańynda ótken tarıhı sátke kýá boldy, dep habarlaıdy Egemen.kz.
Kórsetilim aldynda jergilikti ónerpazdar – DDRECORDS toby arnaıy konserttik baǵdarlama usynyp, kórermenderge patrıottyq ánder arqyly kóterińki kóńil kúı syılady. Ánder men óner kórsetilimderi Otanǵa degen súıispenshilikti arttyryp, elge qyzmet etýdiń mańyzyn dáriptegen.
Sharanyń basty maqsaty – jas urpaqty otansúıgishtikke tárbıeleý, áskerı-patrıottyq sana men rýhty qalyptastyrý. Uıymdastyrýshylardyń aıtýynsha, mundaı bastamalar jastardyń el qorǵany bolýǵa degen yntasyn arttyrady.
Aıta keteıik, Otan qorǵaýshylar kúni – Qazaqstannyń Táýelsizdigi men qaýipsizdigin qorǵap júrgen erlerdiń erligine taǵzym etetin erekshe kún. Astanadan tikeleı kórsetilgen áskerı sherý bul merekeniń máni men mańyzyn tereńirek sezinýge múmkindik berdi.