Aldaǵy 9–14 mamyr aralyǵynda Almaty oblysynyń keń jazırasynda halyqaralyq deńgeıdegi rýhanı hám sporttyq máni zor shara – «Uly dala joryǵy» marafon-báıgesi ótedi. Bul jolǵy alamannyń aıryqsha ereksheligi – Jeńistiń 80 jyldyǵyna arnalýy. Dástúrli doda bıyl ata-babalar rýhyna taǵzym retinde uıymdastyrylyp otyr, dep jazady Egemen.kz.
Baıraqty báseke – batyrlyq pen baptyń, tózim men taǵylymnyń toǵysqan tusy. Erlik pen eldik uǵymyn qatar ustap ótken Baýyrjan Momyshuly bastaǵan qazaq jaýyngerleriniń qaharmandyq jolyna degen qurmet báıgeniń mazmunyn bıiktete túsedi. Olardyń tulǵasy – uly dalanyń erkin perzentteriniń aıqyn beınesi.
Tarıhı derekterden belgili, qazaq jylqylary tek kúndelikti kólik quraly ǵana emes, soǵys pen beıbit kúndegi serigi bolǵan. Batyr Baýyrjannyń aqboz aty týraly tolǵaýy – jylqy men ıesiniń arasyndaǵy jan dúnıelik úndestiktiń aıǵaǵy.
«Men atbaptar qazaqtyń balasymyn. Jylqy júırigin aıtpaı tanımyn. Eger men bilsem, bul – qazaqtyń qarabaıyr jylqysy. Erkin dalada quıynmen jarysa, kósile ósken, keń tynysty janýar. Kún-tún shapsań talmaıdy, ózi aqboz eken», degen batyr sózi el jadynda.
Sol aqbozdyń tuqymy búgingi beıbit kúnde de taqymǵa mingen, táýelsizdiktiń sımvolyna aınalǵan tulparlarǵa aınaldy. Alda kele jatqan «Uly dala joryǵy» osyndaı júırikter men shabandozdardyń tózimin synaıdy.
Jalpy uzaqtyǵy 500 shaqyrymǵa jetetin marafon-báıge eń myqty tulpar men tózimdi shabandozdy anyqtamaq. Dodanyń baǵyty tarıhı hám tabıǵı turǵydan mańyzy zor ólkelerdi qamtıdy. Jarys Almaty – О́skemen tas jolyndaǵy Baqanas kópirinen bastaý alyp, Qonaev qalasynyń «Qarlyǵash» shaǵyn aýdanynda márege jetedi.
Bıylǵy jarysqa elimizdiń 13 komandasymen birge alys-jaqyn shet elderden kelgen 7 komanda – Reseı, Majarstan, Ońtústik Afrıka, Iran, Qyrǵyzstan syndy memleketterdiń ókilderi qatysady. Bul báıgeniń halyqaralyq mártebesiniń bıiktigin bildiredi.
Sheteldik meımandar úshin arnaıy etnoaýyldar tigilip, fotozonalar men ınteraktıvti mádenı alańdar jumys istemek. Osylaısha, «Uly dala joryǵy» tek sporttyq is-shara ǵana emes, el men eldi, mádenıet pen tarıhty toǵystyratyn iri halyqaralyq alańǵa aınalady.
Dodany «JORYQ» at sporty federasııasy, Almaty oblysynyń ákimdigi, Ulttyq sport qaýymdastyǵy uıymdastyrsa, bastamaǵa «AMANAT» partııasy men «Alageum Electric» kompanııasy qoldaý bildirip otyr.