Jaqynda «Atameken» Ulttyq kásipkerler palatasynyń basqarma tóraǵasy Raıymbek Batalov Shymkentke is-saparmen keldi. Basqarma tóraǵasy jumys sapary aıasynda úshinshi megapolıstiń bıznes ókilderimen júzdesti. Ulttyq palata tóraǵasy elimizge belgili kompanııa – «Bal Tekstıl» jaýapkershiligi shekteýli seriktestigine arnaıy at basyn buryp, kilem toqý óndirisimen tanysty.
Fabrıka «Ońtústik» arnaıy ekonomıkalyq aımaǵynda ornalasqan, jylyna 5 mln sharshy metrge deıin kilem ónimderin shyǵarady.
Kompanııa basshysy Talǵat Yshaqov Ulttyq palata tóraǵasyna fabrıkanyń jumysyn baıandap, óndiristegi jańalyqtarmen bólisti. R.Batalov kilem dızaıny qalaı tańdalatynyn, shıkizat qalaı ázirlenetinin jáne daıyn ónimdi jóneltýge deıingi óndiris tizbekterin tamashalady.
Sondaı-aq, «Atameken» UKP tóraǵasy «Bal Tekstıl» fabrıkasynda «KMG PetroChem» JShS Basqarma tóraǵasynyń bıznesti damytý jónindegi orynbasary Dıaz Dııanovpen, sondaı-aq «Kazakhstan Petrochemical Industries Inc» kompanııasynyń basshylyǵymen kezdesti. Jıynda «Bal Tekstıl» kompanııasynyń úlgisinde qazaqstandyq qamtýdy arttyrý máseleleri talqylandy. Máselen «Bal Tekstıl» tutynatyn polıpropılen shıkizatyn júz paıyz fabrıkanyń ózi shyǵarady. Osy sekildi kásipryndar taýar shyǵarýda otandyq shıkizatqa kóbirek ıek artqan jón degen pikir bildirdi palata tóraǵasy. Bul birinshiden otandyq óndiristi sheteldik shıkizatqa táýeldilikten aryltsa, ekinshiden kásipkerlik salasynyń damýyna serpin beredi. Iri kásiporyn janynan qosymsha óndirister ashylý arqyly jańa jumys oryndary paıda bolady. Bul óz kezeginde eldiń áleýmettik máselesin sheshýge oń septigin tıgizedi. Al otandyq ónim neǵurlym Qazaqstannyń shıkizatymen, tehnologııasymen jasalǵan saıyn soǵurlym ulttyq ekonomıka alǵa qaryshtap damıdy. R.Batalov kezdesýde osyndaı pikir bildirdi. Aıta ketý kerek, Ulttyq kásipkerler palatasy jumysynyń negizgi baǵyty – bıznesti suranysqa saı sala-sala boıynsha damytýdy qarastyrady. Sondaı-aq, shıkizat shyǵarýshylar men daıyn ónim óndirýshilerdiń arasyndaǵy seriktestik baılanysty qamtamasyz etýdi kózdeıdi.
«Bal Tekstıl» búgingi tańda elimizdegi otandyq iri taýar óndirýshi bolyp tabylady. Osy sekildi óńirlerdegi kompanııalarǵa «Báıterek», «Damý» qorlary arqyly qoldaý kórsetip, jeńildetilgen nesıe berýdi qarastyrý kerek. Sonymen qatar, qazaqstandyq kompanııalar arasynda offteık kelisimsharttar túzýdiń de mańyzy zor. Bul kelisimsharttyń maqsaty shyǵarylatyn taýardy satyp alatyn tutynýshylarmen aldyn ala kelisimder jasasý. Biz birlesip otandyq bıznesti, jergilikti óndiristi arttyrýǵa kúsh salatyn bolamyz» dedi «Atameken» UKP tóraǵasy R.Batalov.
Jalpy «Bal Tekstıl» – kilemder men kilem ónimderin shyǵaratyn táýelsiz Qazaqstan tarıhyndaǵy alǵashqy fabrıka. Ol sonymen birge, búgingi tańda Ortalyq Azııadaǵy eń iri kilem fabrıkalarynyń birine kiredi. Qurylǵan merzimi 2012 jyl. Kompanııa ónimderi TMD elderi bylaı tursyn, Eýropa naryǵynda da úlken suranysqa ıe. Álemdik saýda jelisi IKEA bir kezderi otandyq kilemdi dúnıe júzi naryǵyna saýdalaǵan.
ShYMKENT