Kúni keshe ǵana IýNESKO-nyń Parıjdegi Bas shtab-páterinde qazaq jáne qyrǵyz aqyndarynyń qatysýymen dúbirli aıtys ótti. Dostyq kezdesý baýyrlas eki halyqqa – qazaq pen qyrǵyzǵa ortaq biregeı ónerdiń 2015 jyly IýNESKO-nyń Adamzattyń materıaldyq emes mádenı murasynyń reprezentatıvtik tizimine enýiniń 10 jyldyǵyna oraı uıymdastyrylyp otyr. Mádenı is-sharaǵa Túrki Mádenıeti jáne murasy qorynyń ókilderi de qatysty.
«Ádebıet jáne óner» portalyna Túrki mádenıeti jáne murasy qorynan berilgen málimetke sáıkes, bul mádenı jıyn Qazaqstan men Qyrǵyz Respýblıkasynyń IýNESKO janyndaǵy Turaqty ókildikteriniń uıymdastyrýymen ótken. Is-shara ortaq ónerimiz arqyly tarıh, taǵdyr tabystyrǵan týystas halyqtar ekenimizdi tanyta otyryp, aıtystyń ǵajaıyp qasıetterin nasıhattaýdy kózdeıdi.
Eýropanyń túrli elderinde turatyn qazaq jáne qyrǵyz dıasporalary bas qosqan aıtys sóz sheberleriniń maqamdy shýmaqtaryna, mazmundy oılaryna, utymdy sóz qaǵysýlaryna toly boldy.
Eki eldiń arda aqyndary – Amanjol Áltaı (Qazaqstan) jáne Mırlan Samyıqojo (Qyrǵyzstan) júrgizgen aıtysta Parlament Májilisiniń depýtattary Nurtaı Sabılıanov pen Janarbek Áshimjan, Qyrǵyz Respýblıkasynyń Jogorký Kenesh depýtaty Shaıyrbek Tashıev, «Manas» teatrynyń basshysy Nurbek Talantbekov jáne basqa da tanymal tulǵalar qazylyq etti.
Sóz jarysynda «Qos báıge» (bólisilgen júlde) qaǵıdatyna sáıkes, Gran-prı Aıbek Qalıev pen Azamat Bolǵonbaevqa tabystaldy. I oryn dıplomdary Dıdar Qamıev pen Aqmatbek Sultanulyna, II oryn Meıirbek Sultanhan men Amantaı Qutmanalıevke, al III oryn Abaı Jolmaǵambetov pen Maqsat Qulıevqa buıyrdy.