Qalada jastar arasyndaǵy jumyssyzdyq deńgeıi tómendep keledi. Búginde 14-35 jas aralyǵyndaǵy turǵyndar sany 695,6 myńnan asady. Bul megapolıs halqynyń 32 paıyzy. Onyń 442,3 myńyn jumys isteıtin jastar quraıdy. Joǵary oqý oryndary men kolledjderde oqıtyndary 287,4 myńdy qurasa, 80 myńǵa jýyǵy joǵary synyp oqýshylary, dep habarlaıdy Egemen.kz.
Almaty qalasynyń Jastar saıasaty basqarmasy jastar arasyndaǵy jumyssyzdyqty azaıtý, ýaqytsha jáne turaqty jumysqa ornalastyrý, tájirıbeden ótkizý, kásiptik oqytý jáne mansaptyq baǵyt-baǵdar berý maqsatynda birqatar jobany júzege asyryp keledi.
Bul baǵyttaǵy negizgi quraldardyń biri – Jasalmaty.kz aqparattyq portaly. Onda «Jobfair365» jumysqa ornalastyrý servısi jáne «SkillBridge» onlaın oqytý men biliktilikti arttyrý platformasy jumys isteıdi. Mysaly, bul platformaǵa 25 myńnan astam biregeı qoldanýshy tirkelgen, 5 myńnan astam jumys berýshi 7 myńnan astam bos jumys ornyn jarııalaǵan. Sonyń arqasynda jyl basynan beri 3,5 myń jas turaqty jumys tapqan.
Jastardy jumysqa ornalastyrýda keshendi jumys júrgizip jatqan jobalardyń biri – Qalalyq mansap ortalyǵy. Buǵan deıin árbir oqý ornynda jeke mansap ortalyqtary bolsa, qazirgi tańda bul júıe jumys berýshilermen, eńbek utqyrlyǵy ortalyqtarymen jáne basqa qurylymdarmen biriktirilgen ortaq platformada jumys isteıdi.
Bıyl jyl basynan beri qalalyq mansap ortalyǵyna 7,5 myń jas júgingen bolsa, olardyń 5,7 myńy jumysqa ornalasqan. Jalpy alǵanda jyldyń basynan beri Almatyda 9,2 myńnan astam jas turaqty jumysqa ornalasqan.
«Birneshe aı jumys izdedim. Mansap ortalyǵynda mamandar baǵytymdy anyqtap, túıindememdi durys jasaýǵa kómektesti. Sonyń arqasynda mamandyǵym boıynsha jumysqa ornalastym. Qazir oqý men jumysty qatar jalǵastyryp jatyrmyn», deıdi qala turǵyny Aldııar Nurymov.
Jumys izdep júrgen jastarǵa qulaqqaǵys, Qalalyq mansap ortalyǵynyń qyzmetin qaladaǵy kez kelgen komıýnıtı-ortalyqtan alýǵa bolady.