Qostanaı oblysynda kúre joldar men kóshelerdi jóndeý, jol ınfraqurylymyn jańartý boıynsha aýqymdy jumys atqarylyp jatyr, dep habarlaıdy Egemen.kz aqparat agenttigi.
Oblystyq kólik jáne avtomobıl joldary basqarmasynyń málimetinshe, bıyl óńirde jergilikti mańyzy bar myń shaqyrymnan astam jol, sondaı-aq, 103 eldi mekende 382 kóshe jóndeýden ótedi.
«Bıyl jergilikti mańyzǵa ıe avtomobıl joldary men kóshelerdi jóndeý jumystaryna 58,8 mlrd qarjy qarastyrylyp otyr. Oblystyq jáne aýdandyq mańyzǵa ıe avtokólik joldaryna 36,6 mlrd teńge, kóshelerdi jóndeýge 18,5 mlrd teńge bólý josparlap otyrmyz», deıdi basqarma basshysy Almas Esenjolov.
Munyń syrtynda, óńirde oblystyq mańyzy bar Rýdnyı – Qashar – Fedorov Uzynkól – Sarykól baǵytyndaǵy avtokólik joldarynyń tozyǵy jetken ýchaskelerin qaıta jańǵyrtý jumystary júrip jatyr.
«Bul joldar kóp jyldan beri jóndeý kórmeı, ábden tozyp apatty jaǵdaıǵa túsken. Qaıta qalpyna keltirý jumystary aıaqtalǵan soń, bul jol ýchaskeleri kólik qozǵalysy úshin qolaıly bolady jáne oblys ishindegi logıstıkany jaqsartady», deıdi A.Esenjolov.
Qostanaı oblysy