«Ulttyq qor – balalarǵa» baǵdarlamasy aıasynda byltyr ár balaǵa 100,52 dollardan eseptelse, bıyl qarjy somasy 129,38-ge deıin ósti. Bul týraly Ortalyq kommýnıkasııalar qyzmetinde ótken baspasóz jıynynda Oqý-aǵartý vıse-mınıstri Edil Ospan málimdedi.
Vıse-mınıstrdiń aıtýynsha, Memleket basshysynyń IV Ulttyq quryltaıda bergen tapsyrmasy aıasynda Balalar quqyqtary jónindegi ýákilmen, Parlament depýtattarymen jáne qoǵam ókilderiniń qatysýymen «Qazaqstan balalary» biryńǵaı baǵdarlamasyn ázirleý baǵytynda keshendi jumys júrgizilip jatyr.
«Qazaqstan balalary» biryńǵaı baǵdarlamasy ár balaǵa teń múmkindik berýdi, olardyń quqyqtaryn qorǵaý men jan-jaqty qoldaý kórsetýdi kózdeıtin turaqty memlekettik saıasattyń irgetasy bolmaq.
Sondaı-aq Edil Ospan 2024 jyldyń 1 qańtarynan bastap Ulttyq qordyń ınvestısııalyq tabysynyń 50 paıyzy 18 jasqa deıingi balalardyń jeke shottaryna avtomatty túrde aýdarylyp jatqanyn atap ótti. Máselen, byltyr ár balaǵa 100 dollardan, al bıylǵy esep boıynsha 129 dollardan kelip otyr. Sonymen qatar alýshylar sany da artyp keledi. Naqtyraq aıtsaq byltyr bul baǵdarlama aıasynda 304 815 bala, bıyl 324 430 bala qamtylǵan.
Budan bólek, vıse-mınıstr sapaly bilim alýǵa múmkindik beretin qosymsha tetik retinde «Keleshek» erikti jınaq jobasy iske asyrylyp jatqanyn jetkizdi. Bul joba memlekettik bilim grantyna qosymsha qarajat jınaýǵa, jastardyń laıyqty mamandyq meńgerýine nemese turǵyn úı máselesin sheshýge múmkindik beredi. Sondaı-aq elimizdegi bastaýysh synyp oqýshylaryn qoldaý maqsatynda 1-4 synyp oqýshylaryna tegin ystyq tamaq berý júıesi keńeıtilip otyr. Bul shara 25 myńnan astam balany qamtydy. Bilim berý mekemelerinde mektep ashanalaryna arnalǵan jańa standarttar daıyndaldy. Densaýlyq saqtaý mınıstrligimen birlesip bekitilgen bul standarttar 1 qyrkúıekten bastap elimizdiń barlyq mektepterinde engiziledi. Rasıondy jańartýmen qatar, tamaqtyń sapasy men qaýipsizdigin, ashanalardyń sanıtarlyq jaǵdaıyn baqylaý sharalary da kúsheıtiledi.
Jıyn barysynda vıse-mınıstr qalalyq jáne aýyldyq mektepter arasyndaǵy alshaqtyqty azaıtý jáne óńirlerde balalardy sapaly bilim alý úshin laıyqty jaǵdaılarmen qamtamasyz etý maqsatynda «Keleshek mektepteri» ulttyq jobasy iske asyrylyp jatqanyna toqtaldy. Onyń aıtýynsha, 2025 jyldyń sońyna deıin 460,4 myń oqýshyǵa arnalǵan 217 jaıly mektep salý josparlanǵan. 2024 jyldyń qorytyndysy boıynsha 105 mektep paıdalanýǵa berildi. «Keleshek mektepteri» jobasy bilim berý salasyndaǵy memlekettik saıasattyń mańyzdy elementi jáne adamı kapıtaldy damytýǵa uzaq merzimdi ınvestısııa bolmaq.
«Sonymen qatar bizdiń mindetterimizdiń biri – balalardyń otbasynda ómir súrý jáne tárbıelený quqyǵyn qamtamasyz etý. Balalar ınternat mekemelerin ınstıtýsıonalsyzdandyrý saıasaty jalǵasyp jatyr. Jyl saıyn el azamattary otbasyna 1000-nan astam jetim balany qabyldaıdy. Naqtyraq aıtsaq, azamattar 2019 jyly – 1111, 2022 jyly – 1019, 2023 jyly – 1063, 2024 jyly – 1274 balany qabyldaǵan. Byltyr balalardy qabyldaıtyn kásibı otbasy ınstıtýty engizildi. Júrgizilgen jumystardyń nátıjesinde balalar úılerinde tárbıelenetin balalar sany sońǵy 10 jylda eki esege (9 myńnan 3,6 myńǵa deıin) qysqardy. Balalar úıiniń túlekterin áleýmettik qoldaýǵa baǵyttalǵan «Meıirim» qaıyrymdylyq aksııasy keńeıtildi. Sondaı-aq jetim balalardy turǵyn úımen qamtamasyz etýdiń jańa tetikteri engizildi. Bul qadamdar elimizdiń árbir kishkentaı azamatynyń baqytty balalyq shaǵynyń kepili bolmaq», dedi Oqý-aǵartý vıse-mınıstri Edil Ospan.