Assambleıa kafedrasynyń róli

L.N.Gýmılev atyndaǵy Eýrazııa ulttyq ýnıversıtetinde elimizde etnosaralyq tatýlyq pen kelisimdi nyǵaıtýdaǵy etnosaıasatty nasıhattaýǵa arnalǵan Qazaqstan halqy Assambleıasy kafedralary qaýymdastyǵynyń ekinshi otyrysy ótti. Qazaqstan halqy Assambleıasy jyly aıasynda uıymdastyrylǵan bul basqosýda elimizdegi etnos­aralyq yntymaq pen birliktiń el damýyna qosyp kele jatqan úlesi atalyp, jańadan ashylǵan kafedralardyń jumysy, olardyń oqý baǵdarlamalary talqylandy. Otyrysqa jetekshilik etken Qazaq­stan halqy Assambleıasy Tóraǵa­synyń orynbasary, Eýra­zııa ulttyq ýnıversıtetindegi QHA kafe­drasynyń meńgerýshisi Anatolıı Bashmakovtyń atap ótýinshe, 2013 jyldan bastap Assam­bleıa elimizdiń jetekshi jo­ǵary oqý oryndarynda ádistemelik alańdar qurý boıynsha belsendi jumys júrgizip keledi. Búginde Assam­bleıanyń elimizdegi ýnıver­sıtetteri janynan on bir kafedrasy ashylypty. Osy ýnıversıtettegi IýNESKO kafedrasynyń meńgerýshi Ǵadil­bek Shalahmetovtiń aıtýynsha, jetekshi oqý oryndarynyń baza­synda ashylyp, jumys istep jatqan Qazaqstan halqy Assam­b­leıasy kafedralarynyń ­stý­dent jastar arasynda tole­rant­ty­lyqty qalyptastyrýda alatyn orny erekshe. Beıbitshilik jáne kelisim ortalyqtarynyń, ǵylymı-zertteý ınstıtýttarynyń qurylýy elimizde etnosaralyq jáne konfessııaaralyq kelisim­ge erekshe mańyz berilip otyr­ǵa­nyn kórsetedi. «Qazaq halqy­nyń ǵasyrlar boıy boıyna sińir­gen qasıetteriniń biri – adam­ger­shi­lik, – dedi kelesi kezekte sóz alǵan Prezıdent janyn­daǵy Mem­­lekettik basqarý akade­mııa­sy etnos­aralyq jáne konfes­sııa­ara­lyq qatynastardy zertteý ortaly­ǵynyń jetekshisi Aıgúl Sádýa­qasova. – Sol asyl qasıet­terimizdi qazirden bastap jastary­myzdyń boıyna darytyp, qalyp­tastyra bilsek, sonda bizdiń eńbe­gimizdiń janǵany bolyp tabylady». Otyrysta, sondaı-aq, QR Pre­zıdenti janyndaǵy «Qoǵam­dyq kelisim» respýblıkalyq memlekettik mekemesiniń qyzmeti de tanystyryldy. Osy mekemeniń ǵylymı-saraptaý jáne ádistemelik qamtamasyz etý qyzmetiniń jetek­shisi Nurbek Shaıahmetovtiń habardar etkenindeı, «Qoǵamdyq kelisim» mekemesi Prezıdenttiń 2014 jylǵy 17 maýsymdaǵy jar­­ly­ǵy boıynsha qurylǵan. Barlyq ob­lys­ta mekemeniń óńir­lik qury­­lym­dary jumys isteıdi. «Qoǵam­dyq kelisim» kommersııa­lyq emes uıym bolyp tabylady. Ol Qazaq­stan halqy Assambleıasynyń qyz­met fýnksııasyn júzege asyrýdy qamtamasyz etý úshin qurylyp otyr. Al QHA kafedralary qaýym­­dastyǵynyń erejesi jóninde Eýrazııa ulttyq ýnıversıtetiniń QHA kafedrasy meńgerýshisiniń orynbasary Mahabbat Qozybaeva aıtyp berdi. Onyń aıtýynsha, Kafedralar qaýymdastyǵy óz qyz­metin eki baǵyt – ǵylymı-ádis­­­temelik jáne ǵylymı-zert­­teý jumystary boıynsha júzege ­asyr­­maq. Ǵylymı-ádiste­melik ju­­mys­­tarǵa Assam­bleıa kafedralary­­nyń oqý úderisteri­niń úıles­tirý jáne onyń sapa­syna baqylaý ­ja­saý, oqý baǵdar­lamalaryn ázir­leý­ge qatysty usynystar engizý, al ǵylymı-zertteý jumystary­na otandyq jáne sheteldik qor­lar­dyń granttaryn alý múmkindik­te­rin izdestirý, ǵylymı jobalardy júzege asyrýǵa yqpal etý, taǵy basqa da máseleler kiredi. Otyrys qorytyndysynda  QHA kafedrasy qaýymdastyǵy týraly ereje bekitildi, sondaı-aq, QHA kafedrasy qaýymdastyǵy keńesiniń quramy saılandy. Álısultan QULANBAI, «Egemen Qazaqstan». ASTANA.