Abaı oblysynda buqaralyq sportty damytý jáne salaýatty ómir saltyn qalyptastyrý baǵytyndaǵy jumystar júıeli túrde jalǵasyp keledi. О́ńir turǵyndarynyń sportpen turaqty aınalysýy úshin barlyq qajetti jaǵdaılar jasalǵan, dep jazady Egemen.kz aqparat agenttigi.
Qazirgi tańda oblysta halyqtyń dene belsendiligin arttyrý maqsatynda 600-den astam sport nysany jumys istep tur. Sonymen qatar, birneshe aýdanda jańa sporttyq ınfraqurylymdardyń qurylysy qarqyndy júrgizilýde.
Oblystyq dene shynyqtyrý jáne sport basqarmasynyń málimetinshe, óńirde 1 stadıon, 25 sport kesheni, 12 júzý basseıni, 75 ashyq hokkeı korty, 1 atý tıri, 1 tennıs korty, 7 ıppodrom jáne 488 alań, olardyń qatarynda shaǵyn fýtbol, sporttyq jáne vorkaýt alańdary turǵyndardyń densaýlyǵyn nyǵaıtýǵa jáne bos ýaqyttaryn tıimdi ári paıdaly ótkizýi úshin jabdyqtalǵan.
– Buqaralyq sportty damytý, halyqtyń barlyq jas sanatyn dene belsendiligine tartý baǵytynda aımaǵymyzda jańa nysandardyń qurylysy jalǵasýda. Qazirgi ýaqytta Besqaraǵaı aýylynda júzý basseıni, Kóka aýylynda «Qazaqstan halqyna» qorynyń qoldaýymen angar tıpindegi modýldik sport zaly, Kýrchatov qalasynda dene shynyqtyrý-saýyqtyrý kesheni, Abaı aýdanynyń Kókbaı aýylynda sporttyq modýl, Jańasemeı aýdanynyń Alǵabas aýylynda dene shynyqtyrý-saýyqtyrý kesheni jáne Borodýlıha aýdanynyń Petropavlovka aýylynda sporttyq-saýyqtyrý ortalyǵynyń qurylysy júrgizilip jatyr, – dedi Abaı oblysy dene shynyqtyrý jáne sport basqarmasy basshysynyń orynbasary Baqyt Bekbosynov.
Onyń aıtýynsha, demeýshilerdiń qoldaýymen de birqatar nysandar boı kóterýde. Atap aıtqanda, Úrjar aýdanynyń Janaı aýylynda jańa sport zaly, Semeı qalasynda jabyq fýtbol manejiniń qurylysy jalǵasýda.
Sondaı-aq, 2026–2028 jyldarǵa josparlanǵan iri jobalar qatarynda Aıagóz qalasynda dene shynyqtyrý-saýyqtyrý kesheni, Abaı aýdanynyń Sarjal aýylynda jáne Jarma aýdanynyń Jańǵyztóbe aýylynda sporttyq modýlder, Semeı qalasynyń Vodnyı jáne Bobrovka kentterinde sport keshenderi bar. Sonymen qatar Semeıdiń jańa yqsham aýdanynda tennıs ortalyǵy, ámbebap muz aıdyny, stadıon, úlken tennıske arnalǵan sport kesheni, muz aıdyny jáne Lokomotıv stadıony aýmaǵynda 80 oryndyq qonaqúıi bar kópfýnksıonaldy sport kesheniniń qurylysy josparlanǵan.