Qytaıdyń jetekshi tehnologııalyq kompanııasy Baidu janýarlar álemine qatysty aýqymdy zertteý jobasyn qolǵa aldy. Kompanııa jasandy ıntellekt tehnologııasyn paıdalana otyryp, janýarlardyń dybystyq jáne minez-qulyq sıgnaldaryn adam tiline aýdarýdy maqsat etýde, dep jazady Egemen.kz.
Joba aıasynda Baidu kompanııasy janýarlardyń daýysyn, qozǵalysyn, minez-qulqyndaǵy ózgeristerdi tirkep, olardy aldyn ala óńdeý arqyly belgili bir júıege keltiredi. Keıin bul derekter jasandy ıntellekt arqyly taldanyp, adamǵa túsinikti aqparat túrinde usynylady. Atalǵan bastama boıynsha kompanııa Qytaıdyń Zııatkerlik menshik ulttyq basqarmasyna patenttik ótinim tapsyrǵan.
Kompanııa ókilderiniń málimdeýinshe, joba qazirgi tańda zertteý kezeńinde, naqty ónimniń qandaı bolatyny ázirge belgisiz.
Janýarlardyń dybystaryn túsinýge umtylǵan bastamalar tek Qytaıda ǵana emes, basqa da elderde júzege asyp keledi. Máselen, 2017 jyly negizi qalanǵan Earth Species Project uıymy neırondyq jeliler arqyly sútqorektilerdiń dybystyq sıgnaldaryn zerdelep keledi.
Sol sekildi CETI (Cetacean Translation Initiative) jobasy 2020 jyldan bastap kashalottardyń qarym-qatynas ádisterin jasandy ıntellekt jáne statıstıkalyq modeldeý arqyly zerttep júr. Joba aıasynda teńiz janýarlarynyń dybystyq belgilerin taldaý arqyly olardyń ózara qalaı «sóılesetini» anyqtalady.
Al Danııalyq zertteýshiler shoshqalardyń emosııalyq kúıin anyqtaý maqsatynda AI tehnologııasyn qoldana otyryp, olardyń qorsyly men reaksııasyn ǵylymı turǵydan zerttegen.
Sarapshylardyń pikirinshe, bul baǵyttaǵy zertteýler úı janýarlarynyń kúıin túsinýge, aýyl sharýashylyǵyndaǵy janýarlarǵa kútim jasaý sapasyn arttyrýǵa, sondaı-aq ekologııalyq jáne etıkalyq normalardy saqtaýǵa aıtarlyqtaı úles qosýy múmkin.
Alaıda, janýarlar men adamdar arasyndaǵy qarym-qatynasty naqty tildik formatqa kóshirý úshin úlken kólemde derek, kópjyldyq zertteý jáne áleýmettik-mádenı aspektilerdi eskerý qajet. Joba nátıjeleri ázirge teorııalyq sıpatqa ıe bolǵanymen, ǵylym men tehnologııanyń damý qarqyny bul armannyń bir kúni shyndyqqa aınalatynyn joqqa shyǵarmaıdy.
Araılym MYRZAHAN, EUÝ stýdenti