Appaq qarǵa oranǵan alyp taýdyń kerim kelbeti janar qaryqtyryp kóz jaýyńyzdy alady. Aspandaǵy aqsha bult qana taý men dalanyń appaq keıpine erekshe nazar salǵanyn ańǵarǵandaı bolasyz. Aqpan aıyndaǵy shyraıly kóriniske qarap ishteı sulý keıipke tańdanysyńyzdy jasyra almaısyz. Ile Alataýynyń máńgi qar men muzdyqtary shaqyraıǵan nurly kúnniń sáýle shashqan ǵajaıyp sulý kórinisi mereıińizdi ósire túsedi. Ile Alataýynyń ózender órnektegen ádemi keıpine kóz toqtatqan saıyn Uzynqarǵaly, Shamalǵan, Qaskeleń, Aqsaı, Qarǵaly, Úlken Almaty, Kishi Almaty, Talǵar, Esik, Shelek arnalary buralań-buralań kúıinde Balqashqa qaraı atyraýlanyp asyǵady. Myń san ózen alqaptarynda kúni erteń dúr kóteriler gúlder men ósimdikter búr jaratynyna ańsaryńyz aýady. Alataý mańǵazdana túskendeı, tuńǵıyq kók aspanǵa ilingen aqsha bult qarly óńirge mıyǵynan qaraıtyndaı, sol sát kóktemniń de jaqyn qalǵanyn sezdirgendeı shatqal-shatqaldyń arasynan altynkúrek jeli lekip bir ótedi. Sol kezderi kóktemniń kúlimdeı kelgenine qýanǵan kúıi betkeı-betkeıde báısheshek, qyzǵaldaq, taýshymyldyq, bóri qaraqat pen sap-sary túske oranyp qaz jýasy kómkeriledi, boı túzep qyzǵaldaq pen sarǵaldaq kóteriledi. Kógildir aspannan nur sebezgilep muzart shyńdardyń ádemi kelbeti keler kóktemniń ýyz beınesiniń ıisi tynysyńdy qytyqtaǵandaı manaýratady, appaq qarly betkeıge ózimsine engen aqsha bult taýly óńirge erkelep kelgendeı syrly minez kórsetedi. Shyrsha basynda qonaqtaǵan bir ýys ulpa qar altynkúrek jeldiń demine shydas bere almastaı eken. Muzart shyńdary janar arbaı túsken Alataý kóz toımas ásemdigimen tánti etedi, ǵajap kórinisine kóz qıyǵyn ǵana tastap tolqyǵan yntyzar kóńilin jasyra almaı, aqsha bult ózimen ózi masattanady... Kirshiksiz, aıqaı, perızat Alataý pák kóńilin jasyra almaı shadyman bolǵysy keledi, sony túsingendeı aqsha bult myń buralyp bılep ala jóneledi... Alataý... Aqsha bult... Osynyń bárine essiz rızashylyq tanytyp jatqan mańǵaz dúnıeniń kerim kelbetin tanytqandaı dersiz... Ertegideı appaq, ádemi álem... Fotoetıýdti túsirgen Dosjan BALABEKULY.