Kókshetaý qalasyndaǵy №1 arnaıy mektep-ınternatta balalarǵa arnalǵan «Mechta» jazǵy mektep lageriniń alǵashqy maýsymy saltanatty túrde ashyldy, dep jazady Egemen.kz.
Inklıýzıvti qoǵamdy damytýǵa baǵyttalǵan «Qolqanat» áleýmettik jobasy aıasynda uıymdastyrylǵan bul shara aıryqsha mańyzǵa ıe. Lager tárbıelenýshilerine merekelik kóńil kúı syılaý úshin balalar súıip kóretin mýltfılmderiniń keıipkerleri-anımatorlar shaqyrylyp, túrli oıyn-saýyq baǵdarlamalar usynyldy.
– Búgin «Mechta» jazǵy lageriniń ashylý saltanaty sátti ótti, – deıdi №1 arnaıy mektep-ınternatynyń dırektory Olga Býrdınskaıa, – merekege oraı Shin-Line kompanııasy barlyq balalarǵa balmuzdaq taratty. Turaqty serigimiz «Qolqanat» áleýmettik jobasy da úles qosa bildi. Sonymen qatar jyl saıyn 1 maýsym – Balalardy qorǵaý kúni qarsańynda bizge kelip, qoldaý kórsetetin Ulttyq qaýipsizdik komıteti departamentiniń ókilderi bıyl da balalardy qýantty. Olar lager tárbıelenýshilerine túrli sporttyq jabdyq syılap, merekeniń mańyzyn arttyra tústi.
Jyl saıyn demeýshilerdiń qatary artyp keledi. Shoqan Ýálıhanov atyndaǵy Kókshetaý ýnıversıteti tarapynan 104 balaǵa arnaıy merekelik dastarhan jaıylyp, túrli tátti-dámdiler usynyldy. Sonymen qatar, basqa da demeýshiler balalarǵa arnap tegin balmuzdaqtar taratty jáne sporttyq jabdyqtar syıǵa tartty. Bul - demeýshilerdiń balalarǵa kórsetken shynaıy qamqorlyǵy men qoldaýynyń jarqyn kórinisi boldy.
Lagerde qaýipsizdik tehnıkasyna baılanysty sabaqtar, bı saıystary, sýret baıqaýlary, teatrlandyrylǵan qoıylymdar jáne kóptegen tanymdyq ári kóńildi baǵdarlamalar qamtylǵan. Ashylý saltanatynda balalar óleń oqyp, bı bılep, kóńil kóterip, erekshe qýanyshqa bólendi. Is-sharanyń sońynda aq dastarhannan dám tatty.
Kókshetaý