«Biz – Jeńis urpaqtarymyz» aksııasy «Dostar» mádenıet saraıynda ótip, jurtshylyq nazaryndaǵy merekelik sharaǵa ulasty. Kókshetaýdaǵy №5510 áskerı bólimi 72-shi gvardııalyq atqyshtar dıvızııasynyń jaýyngerlik týyn saltanatty jaǵdaıda qabyldap aldy. Ony Stepnogor qalasyndaǵy №3517 áskerı bóliminiń komandıri Jarqyn Saparııanov tapsyrdy.
Bul tý Reseı Qarýly kúshteriniń Ortalyq mýzeıinde saqtaýly. Al onyń kóshirmesi 2015 jyldyń 10 qańtarynda Astanadaǵy Ulttyq ulanǵa qarasty jedel brıgadanyń murajaıyna máńgilik saqtaýǵa berilgen edi. Bul tý Ulttyq ulannyń óńirlik bólimderi ornalasqan barlyq 25 eldi mekendegi merekelik saltanattardyń bıik tuǵyrynda jelbireıtin bolady. Sonymen qatar, osynaý qymbat jádiger Otanymyzdyń astanasyndaǵy, 7 mamyr kúngi Áskerı sherýge shyǵarylmaq.
Bul tý óziniń jaýyngerlik jolyn 29-shy dıvızııa jaýyngerleriniń qorshaýdan shyǵý operasııasyndaǵy rýhyn kótergen bolatyn, – dedi Kókshetaýdaǵy №5510 áskerı bólimniń komandıri, podpolkovnık Janbolat Tólegenov. – Odan ári tý Aqmolada jasaqtalǵan 72-shi gvardııalyq atqyshtar dıvızııasynyń jeńisti joldaryna ekpin berdi. Atalǵan dıvızııa Stalıngrad shaıqasynda erlik ónegesin tanytqany tarıhtan málim. Sondaı-aq, Kýrsk doǵasyndaǵy, Harkov, Merefý, Krasnograd, Kırovograd, Dnepr, Rýmynııa, Transılvanııa, Vengrııa, Avstrııa, Chehoslovakııa, taǵy basqa qalalar men elderdi azat etý urystarynda jaýyngerlik tý alǵy shepte boldy. Soǵys jyldarynda gvardııalyq dıvızııanyń 18 myń jaýyngeri men ofıseri orden, medaldarmen marapattalsa, 31 kisi Keńes Odaǵynyń Batyry ataǵyna ıe boldy.
Saltanatty jıynǵa qatysýshylardy Aqmola oblysy ákiminiń orynbasary Nurlan Nurkenov, Aýǵan soǵysy ardagerleri keńesiniń tóraǵasy, zapastaǵy polkovnık Dýanbaı Ybyraev, №5510 áskerı bólimde qyzmet atqaryp jatqan jaýyngerlerdiń ata-analary quttyqtady.
Baqbergen AMALBEK,
«Egemen Qazaqstan».
Kókshetaý.