Almaty oblysy Jarkent qalasynyń mańyndaǵy Aeroutqyr áskerler motoatqyshtar bóliminiń bazasynda qazaqstandyq mergendermen qatar, Qyrǵyz Respýblıkasy Qarýly kúshteriniń alty mergeni de jıyndy aıaqtady. Bul UQShU sheńberinde ótkizilgen oqý-jattyǵýlar barysynda qol jetkizilgen ýaǵdalastyqqa sáıkes ótip otyr.
Jıynǵa Qazaqstan Aeroutqyr áskerleri desanttyq-shabýyldaý, motoatqyshtar brıgadalarynan jáne barlaý bólimshelerinen barlyǵy 170-ten astam mergen qatysty. Budan buryn mergenderdi daıyndaý áskerı bólimderde ótkizilip kelgen bolatyn. Bul joly tuńǵysh ret Aeroutqyr áskerleriniń barlyq mergenderi bir bólimniń aýmaǵyna oqshaý jınalyp bilimi men biliktiligin arttyrdy, kásibı daǵdysy men tájirıbesin jetildirdi.
Úsh apta boıǵy jıynǵa qatysqan áskerı qyzmetshiler kásipqoı serjanttardan quralǵan tájirıbeli nusqaýshylardyń jetekshiligimen dalalyq jaǵdaıda mergendik ónerdiń qyr-syryn meńgerdi. Mergendermen taktıkalyq, taýlyq, ınjenerlik daıarlyqtar men atys daıarlyǵynan sabaqtar ótkizildi. Taý men dalada, kúndiz jáne túngi jaǵdaıda mergender tanys emes jerde baǵdar tabýǵa jattyǵyp, qarýlardyń taktıka-tehnıkalyq sıpattamalaryn zerdeledi, barlaý daıarlyǵynan ótti.
– Mergender barlyq jaǵynan kásibı bolýy tıis. Negizgi kúshterden alys jerde durys is-qımyl jasaýǵa sheshim qabyldaı bilý, «bir atylǵan oq – bir joıylǵan nysana» qaǵıdaty boıynsha jumys isteý olardyń negizgi qaǵıdasy, – deıdi jıyn basshysy, Aeroutqyr áskerleri qolbasshysy basqarmasy jaýyngerlik daıarlyq basqarmasynyń aǵa ofıseri podpolkovnık Janarbek Slıamov. Sondyqtan da Qazaqstan Qurlyq áskerleriniń bas qolbasshysy men Aeroutqyr áskerlerdiń qolbasshysy mergender daıarlyǵyna úlken kóńil bólip otyr.
Jıyn sońynda sertıfıkattar tabys etilip, onyń aıaqtalǵanyn bildirdi. Sertıfıkattarǵa qazaqstandyq mergendermen qatar qyrǵyzstandyq áriptester de ıe boldy. Elderine oralǵan soń olar óz armııasynda qazaqstandyq dástúrge sáıkes jıyndar ótkizip, kórgen-bilgenderin úıretetin bolady.
«Egemen-aqparat».