Búgin tústen keıin Batys Qazaqstan oblysyndaǵy Jympıty aýylynda jeke úılerdiń birinde órt shyǵyp, úı múlikteri men jıhaz janyp ketken, dep jazady Egemen.kz.
Tótenshe jaǵdaılar departamentiniń 112 pýltine sýyt habar 4 maýsym kúni saǵat 15:03-te túsken. О́rt sóndirýshiler oqıǵa ornyna qońyraý túskennen keıin 5 mınýttan keıin kelgen.
«Qutqarýshylar jetken kezde Saǵyrbaev kóshesindegi jeke turǵyn úıdiń birinde 30 sharshy metr aýmaq ashyq jalynmen janyp jatty. Qutqarýshylar bes balany es-tússiz kúıde tapty. О́kinishke oraı, balalar aýrýhanada qaıtys boldy» dep habarlady BQO TJD baspasóz qyzmeti.
О́rt sóndirilip, oqıǵa ornyna TJD basshylyǵy, zertteý-synaq órt zerthanasy, anyqtaý bólimi jáne TJ departamentiniń psıhology kelgen. О́rttiń shyǵý sebebi anyqtalyp jatyr.
Keıbir aqparat boıynsha qaza tapqandar bir úıdiń balalary, olardyń eń úlkeni 2019 jyly týǵan, kishisi nebary 8 aılyq.
Jantúrshigerlik oqıǵadan keıin oblys ákimi Narıman Tóreǵalıev áleýmettik jelide qaza tapqan balalardyń ata-analary men jaqyndaryna kóńil aıtty.
«Meniń tapsyrmam boıynsha oqıǵa ornyna orynbasarym bardy, aýdan ákimi de sol jerde, barlyq qajetti qyzmetti úılestirip jatyr. Ákimdik tarapynan jerleý rásimin uıymdastyrý, psıhologııalyq kómek kórsetý, baspanamen qamtamasyz etý jáne ózge de áleýmettik qoldaý sharalary kórsetiledi. Jaǵdaı meniń jiti baqylaýymda» dep jazdy oblys ákimi.
Batys Qazaqstan oblysy