Daryndy jastardy qoldaý Qazaqstan Respýblıkasynyń Tuńǵysh Prezıdenti – Elbasy Qory qyzmetiniń basty baǵyttarynyń biri bolyp keledi. Atalǵan Qor keshe elordadaǵy «Nazarbaev ortalyǵy» ǵımaratynda birinshi ret sol daryndy jastarǵa Qordyń syılyǵyn saltanatty jaǵdaıda tabys etti.
Ǵımarattyń kireberisinde uıymdastyrylǵan sharaǵa jastar kóp jınalypty. Sondaı-aq, munda Parlament depýtattary, jetekshi joǵary oqý oryndarynyń basshylary, tanymal ǵalymdar, mádenıet jáne qoǵam qaıratkerleri de kelip qatysty. Jalpy, 2008 jyldan bastap Qor jyl saıyn mádenıet, óner jáne ǵylym salasyndaǵy jas daryndarǵa syılyqtar taǵaıyndap keledi. Sondaǵy maqsat – olardyń qyzmetin yntalandyrý jáne shyǵarmashylyq tabystaryn shyńdaı túsý.
Respýblıkalyq deńgeıde ótkiziletin bul konkýrsqa erekshe zertteýler men ázirlemeler, shyǵarmashylyq jobalar men baǵdarlamalar usynylady. Alty jyldyń ishinde Qordyń 100-den astam laýreaty bolǵanyn aıta ketý kerek. Negizinen konkýrstyń ótkizilip turýy shyǵarmashyl jáne ǵylymı jastar ókilderiniń kásibı tabystaryn moıyndaýdyń aıqyn kórinisi dese de bolady.
Qor syılyǵyn saltanatty jaǵdaıda tabys etý rásiminde Qazaqstan Respýblıkasynyń Tuńǵysh Prezıdenti – Elbasy Qorynyń atqarýshy dırektory Saǵyndyq Nurahanov óziniń quttyqtaý sózinde bylaı dedi: «Bul nagrada tanymal qaıratkerlerge ózderiniń joǵary mártebesin taǵy bir dáleldeýdiń, al daryndy debıýtanttar úshin ózderin kórsetýdiń tamasha múmkindigi bolyp tabylady». Qordyń jańa ǵımaraty laýreattarǵa týǵan úıindeı bolaryna senim bildirgen S.Nurahanov ári qaraı sózin bylaısha sabaqtady: «Bul tabys sizderdiń shyǵarmashylyqtaryńyz ben ıdeıalaryńyzdy moıyndaý jáne jańa belesterge kóterilýge yntalandyrý bolyp tabylady. Biz sizderdiń talaptaryńyzdyń eshqashan óshpeıtinine jáne kóptegen jas daryndarǵa shabyt beretinine senimdimiz».
Jalpy belgili bolǵany, 2014 jyldan beri elimizdiń túkpir-túkpirinen 73 joba usynylypty. Kelip túsken barlyq ótinimderdi jetekshi sarapshylar, Qor janyndaǵy Jas ǵalymdar keńesi men Jas shyǵarmashyl jastar keńesiniń músheleri bar konkýrstyq komıssııa qaraǵany belgili bolyp otyr. Sondaı irikteýdiń nátıjesinde 19 eń daryndy degenderi bedeldi nagradaǵa ıe bolǵanyn aıta ketý kerek. Olardyń arasynda «Astana Opera» opera trýppasynyń solısi Saltanat Ahmetova da bar.
Mýzyka óneri atalymy boıynsha syılyqqa ıe bolǵan Saltanat Ahmetova sahnada turyp jınalǵan kópshilikke quıqyljytyp án salyp berdi. Bul rette «Astana Opera» teatrynyń taǵy bir ánshisi Tatıana Vısınskaıa osy mýzyka ónerinde jetken jetistikteri úshin atalǵan atalymǵa ıe bolǵandyǵyn da aıta ketken jón. Ol da sahnada óz ónerin kópshilikke pash etti.
Budan keıin ǵylymda jetken jetistikteri úshin Ál-Farabı atyndaǵy QazUÝ-diń oqytýshysy, hımııa ǵylymdarynyń kandıdaty Ǵalııa Irmuhametova syılyqqa ıe boldy. Sol sııaqty Sáken Seıfýllın atyndaǵy Qazaq agrotehnıkalyq ýnıversıtetiniń oqytýshysy, bıologııa ǵylymdarynyń kandıdaty Vadım Hasanov ta osyndaı marapatqa ıe boldy. Sondaı-aq, Elbasynyń jastyq shaǵyn sheber somdaı bilgen «Qazaqfılm» kınostýdııasynyń belgili akteri Nurlan Álimjanov ta syılyqqa ıegerlerdiń arasynan tabyldy.
Qordyń syılyǵyn saltanatty tapsyrý rásimi dástúr boıynsha klassıkalyq jáne tanymal mýzykalyq konsertpen jalǵasyp, kelýshilerdi merekelik kóńil-kúıge bóledi.
Sóz sońynda aıtarymyz, Qazaqstan Respýblıkasynyń Tuńǵysh Prezıdenti – Elbasy Qory syılyǵynyń jas býynǵa zor múmkindikter ashyp otyrǵan jáne kemel keleshegine kirpish qalaıtyn elordada ótýi óte oryndy. Onyń ústine bul óz kásibı qyzmetinde joǵary kórsetkishterge qol jetkizip júrgen jáne elimiz damýyna úles qosyp kele jatqan jastarǵa úlken demeý. Olaı bolsa, osyndaı syılyqtar kóp bola bersin demekpiz.
Asqar TURAPBAIULY,
«Egemen Qazaqstan».