Keshe Astanada Investısııalar jáne damý mınıstrligi Baılanys, aqparattandyrý jáne aqparat komıteti men Ekonomıka jáne áleýmettik máseleler departamenti Birikken Ulttar Uıymymen birge elektrondy úkimetterdiń aımaqtyq jıynyn ótkizdi.
Jıynda elektrondy úkimetti damytý máseleleri sóz bolyp, 2016 jylǵa deıin atqarylatyn jumystar áńgime ózegine aınaldy. Negizi Birikken Ulttar Uıymynyń elektrondy úkimetter týraly saraptamalary 193 eldiń arasynda salany ǵalamdyq baǵalaýdyń naqty damý ólshemi retinde qalyptasyp úlgergen.
BUU-nyń elektrondy úkimetterdiń damýy týraly esebine zer salsaq, Qazaqstan 2014 jyl boıynsha álem elderiniń ishinde 28-shi orynǵa turaqtapty. Al ashyq teńizge shyǵatyn sý joly joq elder men Ortalyq Azııa memleketteriniń arasynda birinshi orynǵa shyqqan.
Aımaqtyq jıynnyń basty maqsaty, elektrondy úkimet qyzmetterin jetildirý joldaryn talqylyp, jańa usynystar men salaǵa engiziletin ózgeristerdi júıeleý bolyp otyr. Shara aıasynda, semınar-keńes uıymdastyrylyp, ol eki kúnge ulasty. Oǵan aımaqtaǵy 8 elden kelip qatysqan memlekettik organdardyń qyzmetkerleri saladaǵy túıindi máselelerdi talqylaýdan ótkizip, pikir almasty.
BUU-nyń bas shtabynyń salaǵa jaýapty mekemesiniń ókili Rıchard Kerbı baıandama jasap, damyǵan elderdiń elektrondy úkimette jınaqtaǵan tájirıbeleri týraly áńgimeledi.
Nurbaı ELMURATOV,
«Egemen Qazaqstan».