Qala ákimdiginiń resmı saıtynyń málimdeýinshe osydan 5 jyl buryn bastalǵan «Elorda jastary» baǵdarlamasy búginde jemisin berip otyr. Jobaǵa qatysýshylardyń biri Ánýar Nabıev memleket bastamasynyń arqasynda qalaı baspanaly bolǵanyn aıtyp berdi, dep habarlaıdy Egemen.kz.
Ánýar Qorǵanbaıuly aıtýynsha atalǵan baǵdarlamanyń talaptary jastarǵa óte tıimdi.
«2019 jyly jumys isteıtin jastarǵa arnalǵan jalǵa beriletin baspana baǵdarlamasyna qatysyp, 5 jyl boıy memleket bergen páterde turdyq. Ol kezde 2 balamyz boldy. Ulym 3-te, qyzym 2-de. Bul ýaqyt óz úıimizdi satyp alýda mańyzdy ról atqardy. Sebebi biz jaldaý merzimi aıaqtalǵansha, óz úıimizdi satyp alýǵa bastapqy aqsha jınap úlgerdik», dedi 33 jastaǵy elorda turǵyny.
Á.Nabıev zaıyby ekeýi medısına salasynda qyzmet etedi.
«5 jyl boıy biz páterge aıyna 7500 teńge tóleıtinbiz. Oıymsha, bul – óte tıimdi baǵdarlama. Sebebi tabysymyzdy bolashaq baspanamyzdyń alǵashqy jarnasyna jınaýǵa múmkindik boldy. Bıyl naýryz aıynda 5 jyl turǵan páterdi tapsyryp, «Elorda jastary» baǵdarlamasymen Esildiń sol jaǵalaýynan 3 bólmeli páter satyp aldyq. Bul – ásirese jumys isteıtin jastarǵa berilgen úlken múmkindik. Sondyqtan osyndaı baǵdarlama úshin memleketke aıtar alǵysym sheksiz», dedi Á.Qorǵanbaıuly.
Aıta ketken jón, atalǵan baǵdarlama jastarǵa jeńildikpen nesıe berýdi usynady. Nesıeniń maksımaldy somasy – 20 mıllıon teńge, mólsherlemesi – jyldyq 5 paıyz, bastapqy jarnasy – 10 paıyz. Al turǵyn úıdi bastapqy jáne qaıtalama naryqta satyp alýǵa bolady.