Eske salaıyq, búgin aıtýly merekege oraı Qazaqstannyń barlyq meshitterinde aıt namazy oqyldy. Elimizdiń túkpir-túkpirindegi musylman jamaǵaty tańsáriden meshitterge jınaldy. Astanadaǵy respýblıkalyq Bas meshitte QMDB Tóraǵasy, Bas múftı Naýryzbaı qajy Taǵanuly, «Áziret Sultan» meshitinde naıb múftı Ermek Muqataı, «Ábý Nasyr Ál-Farabı» meshitinde Bas múftı keńesshisi Smaıyl Seıitbekov jamaǵatqa Qurban aıttyń mán-mańyzy, qurban shalýdyń tarıhy men hıkmeti týraly ýaǵyz-nasıhat aıtty. Aıt namazynan keıin eldiń amandyǵy men tynyshtyǵy úshin duǵa jasaldy, dep jazady Egemen.kz.
Aıta ketelik, Qurban aıt merekesi qarsańynda Naýryzbaı qajy Taǵanuly Astana qalasyndaǵy áleýmettik jaǵdaıy tómen birneshe muqtaj otbasynyń shańyraǵyna bas suǵyp, qurbandyqqa shalynǵan mal etin, azyq-túlik túrlerin, balalarǵa táttiler men syı-sııapattar tartý etti. Kezdesýde N.Taǵanuly Qurban aıttyń musylman jurty úshin rýhanı-áleýmettik mańyzyna toqtalyp ótti.
«Qurban aıt – birlik pen baýyrmaldyqty arttyratyn ulyq meıram. Qazaqstan musylmandary dinı basqarmasy júzege asyryp kele jatqan Qurban.muftyat.kz onlaın qaıyrymdylyq platformasy arqyly byltyr 136 myńnan astam muqtaj otbasyǵa kómek kórsetildi. Bul – halqymyzǵa tán qaıyrymdylyq pen baýyrmaldyqtyń jarqyn úlgisi, dedi Bas múftı.
Qaıyrymdylyq sharasy turǵyndardyń erekshe rızashylyǵyn týdyryp, merekelik kóńil-kúı syılady. Bas múftı Naýryzbaı qajy Taǵanuly osyndaı ıgi ister aldaǵy ýaqytta da jalǵasatynyn atap ótti.
Sondaı-aq búgin Bas múftı elordadaǵy respýblıkalyq «Áziret Sultan» meshitinde juma namazyn ótkizip, jınalǵan jamaǵatpen birge elimizdiń amandyǵy men birligi úshin duǵa jasap, Qurban aıt merekesine oraı jamaǵatqa izgi tilegin bildirdi.
Aıta ketelik, búgin Qazaqstan meshitterinde «Qurandaǵy izgi (qaıyrymdy) is-amaldar» taqyrybynda juma ýaǵyzy aıtyldy.