Fýtboldan elimizdiń ulttyq quramasy kelesi jyly ótetin álem chempıonatyna irikteý aıasyndaǵy kezekti týrdy ótkizdi. «Astana Arena» stadıonynda Soltústik Makedonııa ulttyq quramasyna qarsy ótken matchta 0:1 esebi tirkeldi.
Tartysqa toly oıynnyń 33-mınýtynda Aleksandr Traıkovskı soqqan gol qonaqtardyń enshisine 3 upaı jazdy. Álı Álıev baptaıtyn bizdiń jigitter baryn salyp oınady. Eki taımda da basymdyq tanytyp, qysym jasap, dúrkin-dúrkin shabýyl bir tolastamady. Maksım Samorodov pen Dastan Sátbaevtyń soqqylary makedonııalyqtar qaqpasynyń birde baǵanynan, endi birde mańdaıshasynan keri qaıtty.
Matchtan keıin pikir bildirgen ulttyq quramanyń bas bapkeri Álı Álıev stadıonǵa kelgen jankúıerlerdiń alǵaýsyz qoldaýyna zor alǵysyn jetkizdi.
– Fýtbolshylarymyzdy jigerlendirip, erekshe atmosfera ornatqan jankúıerlerge alǵysymyz sheksiz. Jigitter baryn saldy, daıyndyqty da tyńǵylyqty ótkizdik. Stadıonda kógildir ekrannan tamashalaǵan qalyń kórermen tartysqa toly oıyn kórdi. Biz sońyna deıin kúresemiz dep serttesken edik, ýádemizdi jutpadyq. Gol soǵatyn múmkindigimiz kóp boldy. Match aldynda qarsylas quramanyń oıyn órnegin kórip, saraladyq. Eýropanyń bedeldi chempıonattarynda oınaıtyn oıynshylar sharbolattaı shyńdalǵan. Olar Ýels pen Belgııa ulttyq quramalaryna qarsy da qaısar minez kórsetti. Sonyń barlyǵyna bizdiń jigitter psıhologııalyq turǵyda daıyn boldy, – dedi bas bapker.
Bul oıynǵa birqatar fýtbolshy qatyspady. Quramanyń bas bapkeri alańǵa shyqpaǵan oıynshylardyń ózindik sebebin de túsindirdi. Onyń aıtýynsha, medısınalyq shtab Túrkııanyń «Beshıktash» klýbynda oınaıtyn Baqtııar Zaınýtdınovti jaraqatyna baılanysty matchqa qatystyrmaý jóninde resmı ótinish joldapty. Biraq Baqtııar oıynǵa qatyspasa da jigitterdi qoldaýǵa arnaıy keldi. Medısınalyq tekseristen ótkennen keıin Georgıı Jýkovtyń da jaraqatynan qulan taza aıyqpaǵany anyqtalǵan. Ramazan Orazov Danııanyń «Sılkeborg» klýbynda jıi alańǵa shyqpaýy sebepti, oıyn tájirıbesi azdyq etkendikten de qatarǵa qosylmaǵan.
Bizdiń jigitter Soltústik Makedonııa ulttyq quramasyna qarsy oıyn aldynda syrt alańda Belarýs quramasymen joldastyq kezdesý ótkizip, 4:1 esebimen jeńildi.
Ashat Taǵybergen ulttyq qurama sapyndaǵy sońǵy oıynyn ótkizip, jankúıerlermen qoshtasty. Alańǵa jigitterdi bastap shyqqan sańlaq ókshelep kele jatqan keıingi tolqynǵa tizgindi beretinin málimdedi.
– Soltústik Makedonııa ulttyq quramasyna qarsy match – ulttyq qurama jeıdesindegi sońǵy oıynym. Bul sheshimge otbasymmen aqyldasyp keldim. Jastarǵa kezek beretin kez jetti. Fýtbol – básekemen shyńdaıtyn sport. Fýtbol álemindegi mansabymdy klýb sapynda jalǵaımyn. Osy «Astana Arena» stadıonynda 30 myń kórermenniń kóz aldynda azýly Danııa quramasyn jeńgenimiz, sol tartysta soqqan golym júregimniń túkpirinde máńgi saqtalyp, eshqashan umytylmaıdy. Ulttyq quramanyń múshesi atanǵanyma, kapıtandyq mindetti arqalaǵanyma qýanyshtymyn», dedi talantty fýtbolshy. Ol 2014 jyly 23 jasynda ulttyq qurama qataryna qosylyp, alǵashqy matchyn Majarstan quramasyna qarsy ótkizdi. 11 jyl ishinde bas komandanyń namysy úshin 64 matchqa qatysyp, 3 gol soqty, nátıjeli 7 pas berdi.
Ulttyq qurama kelesi matchty da óz alańynda ótkizedi, 4 qyrkúıekte Ýels fýtbolshylaryna qarsy oınaıdy. Álem chempıonatynyń fınalyna irikteý synyn J tobynda ótkizetin elimiz quramasynyń enshisinde ázirge 3 upaı ǵana. Kósh basynda 8 upaı jınaǵan Soltústik Makedonııa tur. 4 oıyn ótkizip, 7 upaı enshilegen Ýels quramasy 2-satyda. Belgııa fýtbolshylary 2 matchta 4 upaı jınady. Kósh sońynda upaıy joq Lıhtenshteın quramasy keledi.
Kelesi jyly úsh memleket: AQSh, Kanada hám Meksıka eli tize qosyp ótkizetin álem chempıonatyna О́zbekstan ulttyq quramasy da qatysady. Ortalyq Azııadaǵy bes týysqan eldiń ishinen alǵash bolyp ózbek fýtbolshylary jahandyq mýndıaldyń dodasyna túsedi. Azııa fýtbol qaýymdastyǵyna múshe О́zbekstan ulttyq quramasy joldama úshin Iran, BAÁ, Qatar, Qyrǵyzstan, Soltústik Koreıa quramalarymen tartysqa tústi. Alty komanda arasynan úzdik shyqqan Iran men О́zbekstan fýtbolshylary álem kýbogine qatysý múmkindigin enshiledi. О́zbek fýtbolshylaryn tarıhı jetistikke jetkizgen jergilikti maman – Tımýr Kapadze. Sportqa ulttyq múdde turǵysynan qaraýdyń úlgisi osyndaı bolsa kerek.