Qostanaı oblysynda strategııalyq mańyzy zor «Ortalyq – Batys» avtojol dáliziniń qurylysy bastaldy, dep jazady Egemen.kz.
Joba Memleket basshysynyń IV Ulttyq quryltaıda bergen tapsyrmasy aıasynda qolǵa alyndy jáne elimizdiń kólik ınfraqurylymyn damytý men tranzıttik áleýetin arttyrý jónindegi Úkimet josparlaryna engizilgen.
Qurylys jumystary bir ýaqytta eki núktede – Qostanaı oblysynyń Arqalyq qalasy men Jankeldın aýdanyna qarasty Torǵaı aýylynda bastaldy. Qurylys «Astana – Jánteke – Egindikól – Arqalyq – Torǵaı – Yrǵyz» baǵyty boıynsha júrgizilip jatyr. Joldyń jalpy uzyndyǵy 865 shaqyrymdy quraıdy. Atalǵan jańa jol dálizi elimizdiń ortalyq bóligin batys óńirlermen tikeleı baılanystyrmaq. Sonymen qatar ol Qazaqstandy Transkaspıı halyqaralyq kólik baǵytyna (THKB) shyǵýǵa múmkindik beredi. Jańa baǵyttyń arqasynda Astana men Yrǵyz arasyndaǵy araqashyqtyq 573 shaqyrymǵa qysqarady.
Qurylys jumystary eki baǵytta qatar júrgizilip jatyr: Arqalyq qalasynan Astanaǵa qaraı jáne Torǵaı aýylynan Yrǵyz baǵytyna qaraı. Jobanyń júzege asyrylýy jol boıyndaǵy aýmaqtardyń ekonomıkalyq damýyna serpin berip, jergilikti halyqtyń ómir súrý sapasyn arttyrýǵa yqpal eteri sózsiz.
Jobalaý jáne qurylys jumystarynyń barysynda ekologııalyq máselelerge erekshe kóńil bólinýde. Kıikterdiń qonys aýdarý aımaqtarynda joldyń kóldeneń profılin ózgertý qarastyrylǵan, 1:10 eńis janýarlardyń erkin ári kedergisiz qozǵalýyna múmkindik beredi.
«Ortalyq – Batys» avtojol dáliziniń qurylysynyń bastalýyna negizdelgen saltanatty sharada QR kólik vıse-mınıstri Sátjan Ablalıev bul jobanyń elimizdiń kólik ınfraqurylymyn jańǵyrtýdaǵy tranzıttik múmkindikterin keńeıtip, óńirler arasyndaǵy baılanysty arttyrýdaǵy rólin erekshe atap ótti.
Qostanaı oblysynyń ákimi Qumar Aqsaqalov sapaly logıstıkalyq jeli oblystyń ońtústik óńirlerinde shaǵyn jáne orta bıznesti damytý men halyqtyń ómir súrý sapasyn arttyrýdyń negizgi faktorlarynyń biri bolady dep atap ótti.