Túrkistan oblysynyń Sozaq aýdanyna Jambyl oblysyndaǵy Tasótkel sý qoımasynan 1,5 mıllıard tekshe metrden astam sý baǵyttaldy. Bul jumys byltyr qyrkúıek aıynan bastap qolǵa alynyp, bıylǵy sáýirdiń sońyna deıin jalǵasty. Sýdyń berilýi tabıǵı ekojúıeni qoldaý maqsatyndaǵy is-sharalar aıasynda júzege asyryldy, dep jazady Egemen.kz.
Sozaqqa sý bıyl aqpan aıynda jetti. Qajetti kólemdi qamtamasyz etý úshin Sý resýrstary jáne ırrıgasııa mınıstrligi Qyrǵyzstannyń tıisti mekemelerimen kelissózder júrgizdi.
Mınıstr Nurjan Nurjigitovtiń tapsyrmasyna sáıkes, «Qazsýshar» RMK Jambyl fılıaly men Shý-Talas basseındik ınspeksııasynyń mamandary ózen ańǵaryndaǵy ahýaldy baqylap, sý jiberýdiń qorshaǵan ortaǵa áserine monıtorıng júrgizdi. Jumys toby Sozaq aýdany ǵana emes, sonymen qatar Jambyl oblysynyń Shý, Moıynqum jáne Sarysý aýdandarynda da bolyp qaıtty.
Sozaq óńirine mundaı kólemdegi sý sońǵy bes jylda alǵash ret kelip otyr. Bul jaǵdaı jergilikti turǵyndardyń oń baǵasyn alyp, mınıstrlikke alǵys bildirildi.
«Aýdan jurtshylyǵy atynan sýdyń kelip jatqanyna razylyǵymyzdy jetkizemiz. Aptap ystyqqa qaramastan, osy baǵyttaǵy jumysty toqtatpaı, el ishindegi ahýaldy tikeleı baqylap otyrǵan mınıstrlik ókilderine rızashylyǵymyzdy bildiremiz», dedi Sozaq aýdanynyń turǵyny Rıshat Tańatov.
Sonymen qatar, bıyl mınıstrdiń tapsyrmasyna sáıkes, Shý ózeninen Sozaq aýdanyna sý jetkizetin Fýrmanov aınalma kanalynyń arnasyn tazalaý jumystary qolǵa alynady.