ASTANA. 14 aqpan. «Astana» basketbol komandasy VTB Biryńǵaı lıgasy aıasynda fınlıandııalyq «Baızonsty» qabyldap, 80:90 esebimen ese jiberdi. Bul týraly egemen.kz habarlady.
«Saryarqa» respýblıkalyq velotreginde ótken oıyn qonaqtardyń basymdyǵymen bastaldy. Esep ashyp, alǵashqy upaıǵa ıe bolǵan fınder ýaqyt ótken saıyn qarqynyn kúsheıtip, oıyn tizginin ýystarynan shyǵarǵan joq. Nátıjesinde, birinshi kezeń 12:20 esebimen «bızondardyń» paıdasyna aıaqtaldy.
Ekinshi kezeńde oıyn órnegi ózgerissiz qaldy. «Baızons» qorjynyndaǵy upaı sanyn molaıta berse, «Astana» esepti qysqartý úshin ter tókti. Alaıda, qonaqtar alań ıelerine esh múmkindik bermeı, esepti 35:51-ge jetkizip, úlken úziliske attandy. On bes mınýttyq úzilisten keıin Ramýnas Býtaýtastyń shákirtteri jınaqylyq tanytyp, esep aıyrmasyn aıtarlyqtaı qysqartty. Djeıkovan Braýn, Djerrı Djonson, Pavel Ilın, Nık Medlı syndy «Astana» oıynshylary belsendilik tanytyp, birinen soń biri komandaǵa mańyzdy upaılar alyp keldi. Sonyń nátıjesinde, sheshýshi kezeń aldyndaǵy úziliste tablodaǵy esep qonaqtardyń paıdasyna 57:61-di kórsetip turdy.
Sport keshenine jınalǵan jankúıer sońǵy tórtinshi kezeńde «Astananyń» jeńiske jetetinine senimdi bolǵan. Sebebi, úshinshi kezeńde oıyndaǵy basymdyq tolyǵymen alań ıeleriniń qolyna kóshken edi. Degenmen, «bızondardy» Astanaǵa bastap kelgen bas jattyqtyrýshy Greg Gıbson úziliste shákirtterine jigerin janıtyn sózdermen dem bere bilgeni anyq baıqaldy. Úshinshi kezeńdegi qatelikterinen sabaq alǵan fınlıandııalyqtar qorǵana júrip, qajet upaılaryn qorjynǵa salýdy umytpady. Nátıjesi belgili. «Baızons» jeńiske jetse, «Astana» lıga aıasynda qatarynan 6-ret jeńilip otyr. Búginde elordalyq komanda týrnır kestesinde 12-orynda keledi. Kelesi oıyndy da óz alańynda ótkizetin «Astana» 16 aqpan kúni máskeýlik SSKA-ny qabyldaıdy.
Elaman Qońyr.
Derek: egemen.kz.
Sýret: bcastana.kz.