Almaty qalasynyń prokýratýrasy men TELE2/ALTEL baılanys operatorynyń birlesýimen «SIM KIDS» atty balalarǵa arnalǵan arnaıy SIM-karta jobasy resmı túrde qoldanysqa engizildi, dep habarlaıdy Egemen.kz.
Joba balalardy ınternettegi zııandy jáne destrýktıvti kontentten qorǵaýǵa baǵyttalǵan. Bul bastama Bas Prokýrordyń tapsyrmasyna sáıkes ázirlengen 2023–2025 jyldarǵa arnalǵan keshendi jospar aıasynda júzege asyp otyr. Jospar balalardy zorlyq-zombylyqtan qorǵaý, sýısıdtiń aldyn alý jáne olardyń quqyqtary men ál-aýqatyn qamtamasyz etýge baǵyttalǵan.
«SIM KIDS» SIM-kartasy ata-analarǵa balanyń onlaın áreketterin baqylaýǵa, zııandy saıttar men qosymshalardy avtomatty túrde buǵattaýǵa múmkindik beredi. Sondaı-aq, dybyssyz rejımde bolsa da baılanys úzilmeıdi.
Pılottyq kezeńnen sátti ótken joba búginde barlyq ata-analar úshin qoljetimdi.