13-15 maýsym aralyǵynda Qytaı halyq Respýblıkasynyń Sıan qalasynda Álem kýboginiń fınaly ótti. Buǵan deıingi syndardan súrinbeı ótken otandyq sınhrondy júzý sheberleri bul joly da el namysyn abyroımen qorǵady.
Aıta keteıik, Álem kýboginiń alǵashqy kezeńi Fransııada, ekinshi kezeńi Mysyrda, al úshinshi kezeńi Kanadada elderinde ótken edi. Tórtinshi kezeń – sýper fınal Qytaı elinde uıymdastyryldy. Barlyǵy 16 elden 125 qatysýshy baq synady. Arýba, Aýstralııa, Qytaı, Kolýmbııa, Ispanııa, Ulybrıtanııa, Grýzııa, Germanııa, Majarstan, Japonııa, Qazaqstan, Meksıka, Reseı (beıtarap atletter), Sıngapýr jáne О́zbekstan elderiniń sportshylary sınhrondy júzýden ózara básekege tústi.
Bul jarysqa da elimizdiń sportshylary tyńǵylyqty daıyndalǵanyn atap ótken jón. Jalpy, Qazaqstan Sý sporty túrleri federasııasynyń jańa basshylyǵy – «Samuryq-Qazyna» ulttyq ál-aýqat qory» AQ jáne «KEGOC» AQ ókilderi bolǵaly bul sport salasynyń materıaldyq-tehnıkalyq bazasy aıtarlyqtaı jaqsaryp, jetistikter eselene tústi. Sonyń nátıjesinde qajetti quraldar jańartylyp, jattyǵýǵa qolaıly múmkindik jasaldy. Federasııa búkil el boıynsha fılıaldyq jelilerin belsendi keńeıtip jatyr. Jaqynda ataqty Olımpıada chempıony Dmıtrıı Balandın Federasııanyń bas hatshysy bolyp taǵaıyndaldy.
Sý sporty túrlerin damytý salasynda jasalyp jatqan jumys jemisin berip te jatyr – bıylǵy Álem kýboginiń tórt kezeńiniń qorytyndysy boıynsha elimizdiń sportshylary álemdik reıtıngte joǵarylaı tústi. Qyzdar dýeti boıynsha Iаsmın Tuıaqova, Arına Pýshkına jáne Daıana Jamanshalova álemdik reıtıngte ekinshi orynda tur. «Mıks dýet» baǵdarlamasynda Valerııa Stolbýnova men Artýr Maıdanov úzdik úshtikti qorytyndylady. Toptardyń jetistikteri, ıaǵnı tehnıkalyq, erkin jáne akrobatıkalyq baǵdarlamalar qorytyndysy boıynsha Nargıza Bolatova, Vıktor Drýzın, Áıgerim Qurmanǵalıeva, Ksenııa Makarova, Arına Mıasnıkova, Anna Pavlesova, Jaklın Iаkımova, Janııa Jıenǵazy, Iаsmın Tuıaqova, Valerııa Stolbýnova álem boıynsha úzdikterdiń qatarynan kórindi.
Sınhrondy (ártistik) júzýden sportshylardyń osyndaı joǵary jetistikterge jetip, tórtkúl dúnıeniń kil myqtylary qataryna qosylýy – qýantarlyq jaıt. Aldaǵy ýaqytta da otandyq sý sporty damyp, talaı dodada oljaly bolatynyna senim mol.