QOSTANAI. 14 aqpan. Fedorov aýdanyndaǵy Peshkov aýyly turǵyndarynyń ótinishin Qostanaı oblystyq máslıhat depýtaty Dmıtrıı Gýsak skaıp arqyly tyńdady. Bul «Nur Otan » partııasy men «Qazposhta» aksıonerlik qoǵamy birlesip jasaǵan «Internet jetken núkte» respýblıkalyq jobasynyń tusaýkeseri de boldy. Bul týraly egemen.kz tilshisi habarlady.
«Nur Otan» partııasy oblystyq fılıaly men «Qazposhta» aksıonerlik qoǵamy oblystyq fılıalynyń bul jobasy birden tıimdiligin kórsetti. Oblys ortalyǵynan 120 shaqyrym jerde jatqan Peshkov aýylynan oblys ortalyǵyna at sabyltý turǵyndar úshin ońaı emes. Aýyl poshtasyna ornaǵan «skaıppen» aldymen Peshkov selolyq okrýginiń ákimi Ámirbek Erjanov shyqty. Ol oblystyq máslıhat depýtaty Dmıtrıı Gýsakqa aýyldyń jıyrma jyl boıy aýyz sý azabyn tartyp otyrǵanyn aıtty. 2008 jyly geologııalyq barlaý ekspedısııasy aýyldan bir ret burǵylaǵanda sý ashy bolyp shyqqan. Sodan beri bul másele boıynsha tynyshtyq ornady, aýyldastar aýyz sýdan taryǵyp otyr. Oblys máslıhatynyń depýtaty Dmıtrıı Gýsak: «Aýyz sý shalǵaı aýyl úshin ótkir másele ekeni anyq. Burǵylaý jumysy qarjyǵa keletin másele. Sondyqtan ol jerde jer asty tushy sýy bar ma, joq pa sony bilip alýymyz qajet. Ol úshin aldymen jobalyq-smetalyq qujattar kerek. Aýdan ákimine, oblystyq máslıhatqa, «Nur Otan» partııasynyń oblystyq fılıalyna aýyl turǵyndarynyń atynan, aýdan ákimi tarapynan hat jazylý qajettigin túsindirdi. Men ony máslıhat sessııasynda kóteremin. Sonda Peshkov aýylyna aýyz sý qubyryn tartý, tushy sý tabý jumystaryna qajetti qarjy 2016 jyldyń bıýdjetine júkteletin bolady», dedi.
Munan keıin Peshkov aýylynyń turǵyny Rıta Gýz depýtatqa «aýylǵa kógildir otyn qubyry qashan tartylady?» dep suraq qoıdy. Peshkov aýylynda 2 800 adam turady. Bir mektep, eki balabaqsha bar, jaqynda aýrýhana salyndy. Osynyń barlyǵy ot jaǵyp jylytylady. Aýyl turǵyny órkenıettiń jemisin kórgisi keledi. Rıta Gýz: «Aýylymyz úlken. Jas mamandar keledi, biraq turaqtamaıdy. Jastardyń ketýi toqtar emes. Bizge respýblıkalyq bıýdjetten qarjy bólinip, gaz tartýǵa múmkindik bar ma eken?» dedi. Depýtat munyń da máselesin túsindirdi. Dmıtrıı Gýsak: «Aýdan ortalyǵy Fedorov selosyna 2017 jyly gaz qubyryn tartý josparlanǵan. Aldymen ol jerge taratý stansasyn salynýy tıis. Sodan keıin ǵana aınalasyndaǵy eldi mekenderdiń gazdandyrylýy sheshiledi. Ekinshiden, Fedorov pen Peshkovtyń arasy 25 shaqyrym bolady. Gaz qubyryn tartýǵa bul alys qashyqtyq bolyp sanalady, mıllıondaǵan qarjy ketedi. Muny da esepteý kerek. Sol úshin gaz qubyrynan buryn, onyń jobalyq-smetalyq qujattaryn jasaýǵa, sol úshin qarjy suraýdy sheshý kerek», dedi. Sonymen qatar, depýtat aýyl turǵynyna osy týraly aýdan jáne oblys ákimderine hat jazýǵa keńes berdi.
Peshkov turǵyndarynyń atynan Rıta taǵy da suraq qoıdy. Aýylda elektr energııasynyń aı saıyn qymbattaýynyń sebebin surady. Depýtat bul suraqqa jaýap berýge qınaldy. Ol osy suraqqa jaýapty tıisti oryndardan anyqtap, «Nur Otan» partııasynyń fılıaly arqyly habarlaýǵa ýáde etti.
Mine, aınaldyrǵa sút pisirim ýaqytta alystaǵy Peshkov aýylynyń turǵyndary oblystyq máslıhat depýtatynan ózin oılandyrǵan saýaldarǵa jaýap aldy. «Nur Otan» partııasy oblystyq fılıaly qoǵamdyq qabyldaý bóliminiń meńgerýshisi Gúlnar Tleof: «Aýyldan turǵyndardyń qol úzip shyǵýy qys aılarynda óte qıyn. Al olar búgin «Internet jetken núkte» jobasynyń arqasynda «skaıp» arqyly depýtatymen barlyq másele týraly pikirlesip, suraqtaryn qoıdy. Endi aldaǵy ýaqytta depýtattardyń «skaıp» arqyly qabyldaý júrgizýi aptasyna bir ret uıymdastyrylyp turady», dedi.
Názıra Járimbetova.
Derek, sýret: egemen.kz.