Qazaqstannyń Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev 16 mıllıonnan astam azamattyń jeke derekteriniń jelige taralýy týraly aqparatqa túsinikteme berdi, dep habarlaıdy Egemen.kz.
Májilis kýlýarynda mınıstr bul málimetterdiń jańa emes, burynnan belgili jáne buǵan deıin ınternette tarap ketken derekter ekenin aıtqan.
«Bul jańa derekter emes, memlekettik derekqorlardyń buzylǵany jaıly aqparat joq. Bul – buryndary taraǵan «tarıhı» derekter, qazirgi tańda olar darknette bar. Telegram-arnalarda paıda bolǵan jaǵdaıda olardy buǵattaımyz. Bul málimetter 2024 jyldyń 1 mamyryna deıingi kezeńge tıesili», dedi Jaslan Mádıev.
Mınıstrdiń aıtýynsha, qazaqstandyqtardyń jeke derekteri ara-tura ashyq qoljetimdilikke shyǵyp turady.
«Darknette aty-jóni, keı jaǵdaıda JSN, keıde telefon nómirleri (mobıldi, úı, jumys nómirleri) taralǵan. Biraq bul málimetter ashyq jelige shyqqan sátte biz dereý shara qabyldap, Telegram-arnalardy buǵattap otyramyz», dedi mınıstr.
Esterińizge sala keteıik, buǵan deıin ınternette 16,3 mıllıon qazaqstandyqtyń jeke derekteri jarııalanǵany týraly aqparat taraǵan. Atap aıtqanda, taratylǵan derekter arasynda azamattardyń aty-jóni, jynysy, týǵan kúni, JSN, mekenjaıy, turǵylyqty bolý kúni, mobıldi jáne úı, jumys telefondary, azamattyǵy, ulty jáne basqa da jeke málimetter bar.
Sonymen qatar, mınıstrlik tarapynan derekteri taralǵan azamattarǵa egov.kz elektrondy úkimet portaly arqyly eskertý habarlamasy jiberiletini habarlandy.