Elimizde budan bylaı nomınaly 1 jáne 2 teńgelik monetalar shyǵarylmaıdy. Bul týraly Ulttyq bank tóraǵasy Tımýr Súleımenov málimdedi, dep habarlaıdy Egemen.kz.
Ulttyq bank basshysynyń aıtýynsha, mundaı tómen nomınaldaǵy monetalardy shyǵarý tıimsiz bolǵandyqtan, olardy shyǵarý toqtatylady.
«Biz 1 teńgeni shyǵarýdyń ekonomıkalyq turǵydan tıimsiz ekenin moıyndaımyz. Sondyqtan bizdiń bazalyq josparymyz mynadaı: 1 teńge men 2 teńge aınalymda qala beredi, biraq ony jańadan shyǵarý josparda joq», dedi Súleımenov.
Ol aınalymdaǵy qoldanystaǵy monetalar aınalymnan alynbaıtynyn, tek jańasyn shyǵarý toqtaıtynyn naqtylady.
«Qazir halyqtyń qaltasynda, basqa jerde júrgen monetalar aınalymda qala beredi. Biz olardy aınalymnan almaımyz. Biraq jańalaryn jasaýǵa aqsha jumsamaımyz», dep túıindedi Ulttyq bank tóraǵasy.