Alash rýhanııatynyń alyby, kórnekti memleket jáne qoǵam qaıratkeri, jazýshy Ábish Kekilbaevtyń ómiri men shyǵarmashylyǵy – qazaq eliniń tarıhı jadyndaǵy altyn arqaý. Búgin osy bir taý tulǵanyń rýhanı murasyn urpaqqa amanattap, keler býynǵa tabystaý maqsatynda Qazaqstan Respýblıkasy Prezıdentiniń Arhıvine memlekettik saqtaýǵa resmı tapsyrýǵa arnalǵan saltanatty shara uıymdastyryldy, dep jazady Egemen.kz.
Aıta keteıik, Prezıdent Arhıvine tapsyrylǵan 22 myńnan astam paraq jáne 308 saqtaý birliginen turatyn rýhanı baılyq. Onyń ishinde jazýshynyń kórkem týyndylarynyń túpnusqalary, jeke qoljazbalary, saıası baıandamalary, resmı qyzmet kezindegi jazbalary, tipti issaparlyq estelikterine deıin túgel qamtylǵan. Kópshilik bile bermeıtin bir erekshelik – Ábish Kekilbaıuly barlyq eńbegin qolmen jazǵan.
Mundaı aýqymdy arhıvti saqtap, rettep, memleket ıeligine tapsyrý – úlken jaýapkershilik pen kóregendik. Bul rette jazýshynyń urpaqtary, ásirese nemeresi Abyl Kekilbaev úlken eńbek atqarǵan. Ol Prezıdent Arhıvimen kelissózderdi eki jyldan astam ýaqyt boıy júrgizip, ár qujatty suryptap, jınaqtap, memlekettik qorǵa tapsyrǵan.
«Bizdiń basty maqsatymyz – osy arhıvti joǵaltpaı, ony durys jaǵdaıda saqtaý jáne ǵylymı aınalymǵa engizý. Prezıdent Arhıvinde qujattardy kásibı saqtaý júzege asyrylyp qana qoımaı, olardy sıfrlandyrý men qalpyna keltirý jumystary da júrip jatyr. Keıbir joǵalǵan bólikteri qaıta qalpyna keltirilýi múmkin. Eń bastysy – bul materıaldar zertteýshilerge, sonyń ishinde bolashaq urpaqqa qoljetimdi bolady. Arhıvpen kelissózdi biz eki jyl buryn bastadyq, al 2025 jyly, Astanada jańa ǵımarat ashylatyny belgili bolǵan soń, naqty qadamdar jasaldy – qoljazbalardyń túgendelýi, jınaqtalýy jáne!tapsyrý kezeńi uıymdastyryldy. Odan bólek, jazba dápterleri, is-sapar kezindegi estelikteri jáne jeke qujattar da tapsyryldy», dedi Abyl Kekilbaev.
Jalpy Prezıdent Arhıvi búginde 1,5 mıllıonnan astam saqtaý birligin qamtıdy. Onyń ishinde ǵylym, mádenıet, saıasat salasynda elge eńbegi sińgen tulǵalardyń jeke qorlary bar. Endi sol tizimge Ábish Kekilbaıulynyń arhıvi de qosyldy.
«Ábish Kekilbaıuly – tereń oıly, memleketpen elge adal qyzmet etken qaıratker. Ol Joǵarǵy Keńestiń tóraǵasy, Memlekettik hatshy sııaqty!jaýapty qyzmetterde bolyp, táýelsiz eldiń damý baǵytyna úlken úles qosty. Onyń jeke arhıvi – egemen Qazaqstannyń qalyptasý kezeńindegi saıası sheshimder men tarıhı oqıǵalardy tereń zerdeleýge múmkindik beretin qundy derekkóz», dedi Prezıdent Arhıviniń dırektory Álııa Mustafına.
Sonymen qatar Prezıdent Arhıvi sońǵy jyldary arhıvtik qujattardy sıfrlyq formatqa kóshirýde úlken jetistikterge jetken. Búginde 25 mıllıonnan astam qujat sandyq júıege engizilgen, olardyń 90 paıyzy zertteýshilerge elektrondy túrde qoljetimdi. Osy jolda Ábish Kekilbaevtyń da jeke arhıvi tolyqtaı sıfrlandyrylady.