Semeı qalasynda Ákimshilik quqyqbuzýshylyqtar jónindegi mamandandyrylǵan aýdanaralyq sot jergilikti turǵyndy qaıtalanǵan usaq buzaqylyq jasaǵany úshin kináli dep tanydy. Er adam kýágerlerdiń kózinshe marshrýt júrgizýshisin balaǵattaǵan, dep habarlaıdy Egemen.kz.
Oqıǵa qoǵamdyq kólikte №2 baǵyttaǵy avtobýsta bolǵan. Is materıaldaryna sáıkes, júrgizýshimen janjal kezinde I. qoǵamdyq tártipti buzyp, jolaýshylarǵa moraldyq jaısyzdyq týdyryp, qatty daýyspen balaǵat sózder aıtqan.
Sotta quqyq buzýshy óz kinásin jartylaı moıyndady – tek tártip buzǵanyn rastady, biraq buzaqylyq áreketterin moıyndamady.
Alaıda, sot I.-diń bul jyl ishindegi ekinshi ret tártip buzǵanyn eskerdi. Buǵan deıin, 2025 jyldyń 10 maýsymynda ol dál osyndaı minez-qulqy úshin QR ÁQBtK-niń 434-babynyń 1-bóligi boıynsha jaýapqa tartylǵan.
Sot usynylǵan dálelder men túsiniktemelerdi qarastyryp, I.-diń áreketin QR ÁQBtK-niń 434-baby 2-bóligi – «Usaq buzaqylyq, bir jyl ishinde qaıtalap jasalǵan» dep saralady. Ol 20 táýlikke ákimshilik qamaýǵa alyndy.
Sot qaýlysy ázirge zańdy kúshine engen joq.